Tuesday . 18 June 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Bamwe batwara abantu mu bigo by’inzererezi babarenganya (transit centre)

Friday 29 March 2019, by : MUTESI Scovia
    Yasomwe na

Si rimwe si kabiri humvikana ko umuntu yafashwe akajyanwa mu kigo kinyurwamo by’igihe gito bikarangira arekuwe vuba cyangwa bitinze ariko nta myitwarire ibangamiye abandi yamugaragayeho.

Impamvu ni nyinshi zirimo kuba hatangwa ruswa, kugirana ikibazo n’ufite ubushobozi bwatuma akugezayo ariko hari n’icyuho kigaragara mu Iteka rya Minisitiri Nº 001/07.01 ryo ku wa 19/04/2018 rigena inshingano, imiterere n’imikorere by’ibigo binyurwamo by’igihe gito (transit centre).

Ikigo kinyurwamo by’igihe gito ni ahantu hagenewe kunyurwamo by’agateganyo n’abantu bagaragaza imyitwarire yatuma bajyanwa mu kigo ngororamuco.
Iri teka rigaragaza ko abakwiye kujyanwa muri ibyo bigo ari abafite imikorere cyangwa imyitwarire mibi nk’uburaya, gukoresha ibiyobyabwenge, gusabiriza, ubuzererezi, ubucuruzi bwo mu muhanda cyangwa kubunza ibicuruzwa mu nzira mu buryo butemewe ‘n’indi myitwarire yose ibangamiye abaturage.’

Ibi twabigereranya n’umuntu watanga sheki (cheque) isinye itujujeho amafaranga akabwira uyihawe ngo azashyireho ayo bumvikanye; uyihawe abasha gushyiraho ayo ashaka kuko aba yamaze gusinyirwa. Ririya teka ryakabaye rigaragaza ibikorwa byose bituma umuntu ajyanwa mu bigo binyurwamo by’igihe gito aho gusiga icyuho cyo kuvuga ngo n’undi wese ugaragaraho ibindi bikorwa cyangwa imyitwarire bitasobanuwe.

Kuba iteka rigena ko n’undi wese ufite imyitwarire ibangamiye abaturage yajyanwayo ubwabyo ni inzira y’ushaka kurenganya umuturage nk’uko bivugwa na bamwe mu bagiye bagezwa mu bigo binyurwamo by’igihe gito.

Umugabo wo mu Karere ka Bugesera twise Mugabo kubera ko atifuje kumenyekana avuga ko yagiranye ibazo n’umugore we, umugore ahamagara uhagarariye Polisi y’Igihugu mu Murenge wa Ruhuha araza afata umugabo amurega guhotera umugore we; Polisi imushyikirije Urwego rw’Igihugu rushinzwe Iperereza (RIB), umukozi wa RIB yanga kumufunga kuko ibyo bamuregaga yabonaga bitagize icyaha cyamufunga ariko umupolisi amujyana mu kigo kinyurwamo by’igihe gito cya Ruhuha ku wa 6 Ugushyingo 2018 arekurwa amazemo iminsi 16.

Mugabo yagize ati “uyu mupolisi haba hari amafaranga yahawe n’umugore ngo anyumvishe nubwo nta gihamya ko yahawe ruswa ariko nta yindi mpamvu kuko ntacyo napfaga n’uwo mupolisi ku buryo yari bunjyane muri icyo kigo cy’inzererezi ndi umugabo ufite urugo, ufite uruganda, nkoresha abakozi basaga magana abiri, nkitwa inzerezi.”

Akomeza avuga ko usibye kuba hari ibyo atumvikanyeho n’umugore we atigeze amukubita kuko iyo amukubita RIB yari bumufunge.

Kugirango Mugabo afungurwe, ubwo ikinyamakuru Mamaurwagasabo cyabazaga iby’ifungwa rye CP John Bosco Kabera, Umuvugizi wa Polisi y’Igihugu, yavuze ko bagiye gukurikirana icyo kibazo basanga yarafunzwe binyuranyije n’amategeko baramufungura.

CP Kabera avuga ko Komanda wa polisi muri Ruhuha yahawe ibihano byo mu rwego rw’akazi, abirangije yimurirwa ahandi.

Si Mugabo gusa wahuye n’aka karengane kuko hari n’ abakozi bane bo mu Karere ka Muhanga bafungiwe mu kigo kinyurwamo by’igihe gito cya Muhanga bazira kutishyura inguzanyo bahawe n’Umurenge SACCO, amakuru akavuga ko ubuyobozi bw’Akarere ari bwo bwabajyanyeyo ariko bwo bukabihakana, nk’uko Umuseke wabitangaje ku wa 2 Mutarama 2019. Ukurikije ibiteganywa n’iteka, aba bakozi ntibagombaga kujyanwa mu kigo kinyurwamo by’igihe gito kuko amakosa bakoze atagaragara mu byatuma abantu bajyanwa muri ibi bigo.

Izi ngero zigaragaza ko iki kigo gishobora gukoreshwa nabi na bamwe mu bafite ububasha mu guhohotera umuntu cyangwa mu kwaka ruswa.

Hari ibyo iteka riteganya kugira ngo uwafashwe ajyanwe muri ibi bigo hakabaho n’abagenzura ko byubahirijwe nyamara ntibyakunda mu igihe hakigaragara icyuho mu iteka.
Hari ikibazo mu mikorere ya komite y’abagenzuzi

Iteka risobanura komite ngenzuramyitwarire nk’itsinda rishinzwe igikorwa cyo gusuzuma, gutoranya no gushyira mu byiciro abarangwa n’ibikorwa cyangwa imyitwarire bibangamira abaturage no gukurikirana uko bagororwa by’igihe gito.
Muri uko gutoranya, komite igomba kuganira n’uwazanywe mu kigo nk’uwagaragaweho ibikorwa cyangwa imyitwarire ibangamira abaturage, mu kumushakaho amakuru, no gufata icyemezo cy’ikigomba kumukorerwa cyangwa aho agomba koherezwa.

Iyi komite muri buri karere ikuriwe n’Umuyobozi w’Akarere wungirije ushinzwe imibereho myiza y’abaturage, ikabamo Umuyobozi ufite mu nshingano imibereho myiza y’abaturage, umukozi wa Minisiteri y’ubutabera ushinzwe ihuzabikorwa n’ubufasha mu butabera, Umuyobozi w’Ibitaro by’Akarere, Umukozi mu Karere ufite urubyiruko mu nshingano ze, Umukozi mu Karere ufite abana mu nshingano ze, n’Ukuriye ikigo kinyurwamo by’igihe gito mu Karere.

Iteka riteganya ko iyi komite isura abajyanwe muri ibi bigo mu gihe kitarenze amasaha 72 ahwanye n’iminsi itatu.

Nyamara bamwe bajyanwe muri ibyo bigo bavuga ko bamaze igihe kinini iyi komite itarabageraho ngo bayigezeho ibibazo byabo.

Mugabo yemaze ko iminsi 16 yahamaze, iyo komite nta yo yabonye kugeza ubwo yafungujwe n’abayobozi ba polisi.

Abajyanwa mu kigo kiri mu mugi wa Kigali i Gikondo ahazwi nko kwa Kabuga na bo bavuga ko babajyana bakabashyirayo bakabaha impapuro zanditseho ibyo bafatiwe; naho ngo iyo komite ishobora kuza rimwe mu kwezi iyo huzuye bagira ngo bagabanye babone aho bashyira abandi bazanye.

Abashinzwe gufata abakora ibikorwa bibangamiye abaturage bagizwe na Polisi, abanyerondo b’umwuga na DASSO.

Mu kiganiro n’abanyamakuru cyabaye ku wa 18 Werurwe 2019 mu cyumweru cyahariwe ubutabera, Umuyobozi w’Ikigo cy’Igihugu gishinzwe Igororamuco (NRS) Bosenibamwe Aimé yemeye ko hari abantu mu nyungu zabo bakoresha ibyo bigo barenganya abandi.

Yagize ati “ibyaha ntibikwiye kwitiranwa n’imyitwarire mibi; hari abafatwa banywa ibiyobyabwenge bakajyanwa kugororwa, bakigishwa… ariko ubicuruza ubyinjiza mu gihugu afatwa nk’umunyacyaha, ashyirwa RIB agahanwa kuko ni umunyacyaha uwo.”

Yakomeje agira ati “ntawahakana ko imyitwarire ya bamwe bahohotera abandi ihari ariko n’ubikoze bikamenyekana arabihanirwa. Abafite amakuru bajye bayatanga n’uwabikoze ahanwe. Dufite abakurikiranwe kuko babangamiye uburenganzira bw’abo bita abakora ibikorwa bibangamiye abandi kandi bababeshyera.”

Umunyamategeko Tuyishime Deo asanga iri tegeko ryaratanze icyuho kuko ntiryerekana aho rirangirira yagize ati “kuba bavuga ko abafite imyitwarire mibi ivugwa mw’Iteka bakongeraho n’indi yose ibangamiye abaturage nta bwo bisobanutse ibyo bitanga irembo ry’uwakurenganya,ikindi cyuho kiri muri iri teka kuba iyo komite itajuririrwa ngo harenganurwe uwarenganye, ibyo bituma na ya masaha 72 iyo atubahirijwe ngo ubonane na komite ntubona aho ujuririra ngo urekurwe.”

Tuyishimire akomeza avuga ko iyo umuntu yafunzwe na RIB wenda bikarenza amasaha yagenwe n’itegeko iyo ugeze mu bushinjacyaha ugasanga amasaha atarubahirijwe urarekurwa ukaburana uri hanze(udafunzwe) ibyo bikwiye gusobaka bizaganya na batindamo mu gihe bakabaye baratashye cyangwa baratwawe kugororwa mu bigo by’igihe kirekire, hakwiye kongera gukosora iri teka kugirango abarengana barengerwe.

Ibi bivugwa n’umunyamategeko bishobora gutuma n’ubwinshi bwa banjyanwamo bwiyongera aho mu kigo cyahazwi nko kwa Kabuga Igikondo hemerewe kwakira abagera kuri 1500 ariko kuri izi tariki 22/03/2019 hari 2,303 bivuze ko 803 badafite aho bari (serevise bahabwa bivuze ko zidahagije) ibi byaba igihamya ko iyi komite yatinze kuza kuko harimo umubare urengeje uteganyijwe.

Mu Rwanda habarurwa ibigo bigororerwamo by’igihe gito bigera kuri 28 bishobora kwakira abagera ku 4645 naho imibare ya NRS yo ku wa 22 Werurwe 2019 ikaba igaragaza ko muri ibi bigo harimo abantu 4407.
Iyi mibare ni yo kuri tariki 22/03/2019 y’abari mu bigo binyurwamo igihe gito twayikuye mu kigo NRS

Iki gishushanyo kiragaragaza imibare ibigo bikwiye kwakira niyobifite. Ibara ry’icyatsi niyo ibigo bitegetswe kwakira itukura niyo bifite
tugamije kwerekana ko hari naho bakiriye abarengeje ubushobozi bw’ibigo.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru