Friday . 10 April 2020

INKURU ZIGEZWEHO

  • 4 June 2019 » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Mu Rwanda habereye inama yiga ku ndwara zititabwaho

Tuesday 28 January 2020, by : MUTESI Scovia
    Yasomwe na

Minisiteri y’Ubuzima (MINISANTE) yatangije ibikorwa by’amezi atandatu bitegura inama y’Abakuru b’Ibihugu na za Guverinoma izabera mu Rwanda ku ndwara zititaweho ‘Kigali Summit on Malaria and Neglected Tropical Diseases’ (NTDs), iyi nsanganyamatsiko ikaba ari imwe mu bizaganirwaho mu nama y’Ibihugu bikoresha Ururimi rw’Icyongereza (CHOGM) izabera i Kigali muri Kamena 2020.

Ni ibikorwa byo kurwanya indwara zititaweho mu bihugu biri mu nzira y’Amajyambere ziganjemo indwara z’inzoka zo mu nda hamwe na marariya ibihugu bigomba kwitaho mu kugera ku iterambere ry’abaturage.

Minisitiri w’Ubuzima, Dr. Gashumba Diane, ubwo yatangizaga inama, kuri uyu wa 27 Mutarama 2020, yavuze ko iyo nama izaba ari umwanya ukomeye wo guhuza abakomeye mu gushaka uko harandurwa izo ndwara.

Yibukije ko umuntu umwe mu bantu batanu ku Isi apfa azize izo ndwara, kandi buri mwaka marariya ubwayo ihitana abarenga ibihumbi 400 biganjemo abana mu gihe abarenga 90% byabo ari abo ku mugabane w’Afurika
U Rwanda rugiye kwakira iyi nama mu gihe rutangaza ko rwateye intambwe nini mu kurwanya indwara zititabwaho kuko inyinshi zahacitse nkuko byemezwa n’umunyamabanga wa leta muri minisiteri y’ubuzima.

“Hari indwara y’umusinziro iterwa n’isazi ya Tse Tse (Trypanosomiasis)iyo imaze imyaka myinshi itagaragara mu Rwanda ariko kugirango byemezwe urabigenzura ukajya upima ureba ko nta muntu ufite ako gakoko, tumaze iminsi ntako tubona ubu rero tugiye gutangariza Isi ko tumaze imyaka tutakabona.” Ndimubanzi akomeza avuga n’izindi zitaba mu Rwanda.

“Hari indwara zigera kuri 17 zirimo Dracunculiasis (Guinea Worm Disease)ni indwara y’inzoka itembera munsi y’uruhu iyo mu Rwanda ntayo, indi yitwa Trachoma nayo ni inzoka ifata mu maso igatuma abantu bahuma iyo nayo mu Rwanda ntayihari ku buryo twavuga ko ari ikibazo cyugarije benshi. Hari n’izindi zidahari twebwe izo tuvuga ubu zihari dufite ni iziterwa n’inzoka zo mu nda nka Schistosomiasis turi kurwanya ngo nazo zishire.” Minsitiri Ndimubanzi akomeza avuga ko indwara ziterwa n’inzoka zo mu nda nazo zigenda zigabanuka aho batangirije gahunda yo guha abana bakiri bato umuti wazo kabiri mu mwaka, gushishikariza abantu kugira isuku no gukaraba intoki bavuye mu bwiherero na mbere yo kurya, kugira ubwiherero bwujuje ibyangombwa n’ibindi.

Izi ndwara zititabwaho zirimo nk’inzoka zo mu nda, indwara zitera ku byimba kw’ibice bimwe by’umubii nkibikunze kwitwa imidido, inzoka zitera ubuhumyi n’izindi zizwi cyane mu ndimi z’amahanga arizo: Buruli Ulcer,Chagas Disease.,Cysticercosis,Dengue Fever,Dracunculiasis (Guinea Worm Disease),Echinococcosis,Fascioliasis,Human African Trypanosomiasis(African Sleeping Sickness)

Usibye izi ndwara zibasira abakene cyane bo mu Bihugu bikennye u Rwanda kandi rwishimira ko hari intambwe rwateye mu kurwanya malariya runiha n’intego yo kuyirandura burundu.

“ Kuva mu mwaka wa 2014 twakoze gahunda yihariye yo kurwanya malariya kuko yari yariyongereye cyane, kuva mu mwaka wa 2015 twari dufite abantu 663 bishwe na malariya, mu mwaka ushize wa 2019 malariya yahitanye abagera kuri 200, twagabanyije impfu ziterwa na Malariya kugeza kuri 60%, ibyo byagezweho kuko imiti ya malariya itangwa n’abajyanama b’ubuzima bigafasha ko abantu bayipimisha kare bakananywa imiti kare.” Minisitiri Ndimubanzi akomeza avuga intego u Rwanda rwihaye kuri Malariya.

“Dukorera ku mihigo, umuhigo wo kurandura malariya ni uko mu mwaka wa 2030 tuzaba twamaze kuyirandura ni ukuvuga ko muri uwo mwaka izaba yaragabanutse cyane kuburyo itazaba ikiri ikibazo ku buzima rusange, ibyo bizagerwaho dufatanyije n’ibihugu bidukikije kugirango nitugabanya iyo mibare ntihazaze imibu ivuye mu bindi bihugu.”

Ishami ry’umuryango wabibumbye ryita ku buzima ritangaza ko buri mwaka abarenga miliyoni 200 barwara malariya buri mwaka igahitana abandi barenga ibihumbi 400. abarenga miliyari 1.5 nabo ku Isi ni ukuvuga umwe mu bantu batanu afite ibyago byo kurwara imwe mu ndwara zititabwaho

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru