Saturday . 16 November 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Ngororero/Muhanda :Imiryango yarokotse jenoside yakorewe abatutsi irishyuza miliyoni 600 z’imitungo yangijwe.

Saturday 28 September 2019, by : MUTESI Scovia
    Yasomwe na

Yanditswe na: NGABOYABAHIZI Protais.

Abarokotse Jenoside yakorewe abatutsi bo mu murenge wa Muhanda akarere ka Ngororero;bo mu miryango igera kuri 30, ni bo bishyuza amafaranga agera kuri miliyoni 600, akomoka ku mitungo yangijwe ndetse n’iyasahuwe mu gihe Jenoside yakorerwaga abatutsi mu Rwanda mu mwaka wa 1994.

Aba baturage bavuga ko bamaze imyaka igera kuri 14, bishyuza miliyoni zisaga 600 z’ imitungo yabo yangijwe irimo inka, amazu yangijwe n’ibindi; bajya kwishyuza bagasanga imitungo yabo barayikuyeho bakayibaruza ku bavandimwe babo, kuri ubu bakaba ngo babitse amarangizarubanza yo muri Gacaca, ibintu bumva ko ntacyo bibamariye.


Abo_muri_muhanda_bahora_bagendana_amarangizarubanza.

Mukandoli Beatrice ni umwe mu barkotse Jenoside bo mu murenge wa Muhanda
Yagize ati : « Kuri ubu twarumiwe rwose nkanjye imitungo yanjye yasahuwe indi yangizwa na Nzirorera, ku buryo ifite agaciro ka miliyoni 30 z’amafaranga y’u Rwanda, ariko mu gihe cyo kurangiza urubanza , nasanze byose yarabyibaruje kuri bene wabo none ubu mfite amarangizarubanza gusa , imyaka ibaye 14, nta gikorwa , nifuza ko batwishyura kugira ngo dukomeze kubaho neza kuko byaduteye ubukene bukabije ».

Aba barokotse abenshi batuye mu nkengero z’ishyamba rya Gishwati bavuga ko batwawe inka zabo none bakaba barabuze uzibishyura.Kandi ngo ababikoze bakaba barahunze ubutabera n’imitungo yabo bakayibaruza ku miryango yabo yasigaye mu Rwanda ku buryo kubishyuza byagoranye.

Havugimana Songa Sammuel ni umwe mu barokotse ,asanga bakwiye kwishyurwa, ariko agashimira ko Leta hari inka yaboroje.

Yagize ati : “Kuba twararokotse ni ku bw’Imana ndetse n’inkotanyi zaturokoye zikatugeza kuri Leta y’ubumwe, ariko kuba twarabuze abacu bakongeraho kutunyaga ibyacu bikazimirabira ibi ni ibintu bidushengura, njye nishyuza uwitwa Setako Euphrem miliyoni 60, ariko ubu barahunze ntituzi aho bari,nyamara tuburana imitungo yabo yari ibabaruyeho, ndetse n’inkiko zirayemeza duhabwa n’amarangiza rubanza, ariko twatunguwe n’uko kugeza ubu imitungo yabo itakibanditsweho bayibaruje kuri bene wabo mu buryo bw’amayobera, ubu tubitse amarangizarubanza na yo tutazi niba azishyurwa, turasaba ko Leta idufasha tukishyurwa ».

Umuyobozi muri Minisiteri y’ubutabera ushinzwe ubutabera bw’abaturage Urujeni Martine, we asaba abatsindiye indishyi, gukomeza gushaka ibimenyetso kugira ngo iyo mitungo iboneke.

Yagize ati : « “ Ikibazo cy’abagize uruhare muri Jenoside yakorewe abatutsi mu 1994, bagasahura bakangiza koko ni ikintu kizwi, ariko nanone niba hari bamwe mu binangira kuriha no gusubiza iby’abandi bajijisha bakikuraho imitungo, turasaba ko bakomeza kugana inkiko bakongera bagatanga ibimenyetso cyane aho bakeka koko ko imitungo bagiye bayikuraho , turabasaba kujya batanga ibimenyetso cyane ko iyo mitungo iba igaragara koko , kandi nizera ko bazahabwa ubutabera”.

Urujeni kandi akomeza asaba buri wese wagize uruhare muri Jenoside, kuriha imitungo bangije kugira ngo gahunda y’ubumwe n’ubwiyunge by’abanyarwanda bikomeze kugerwaho.

Jenoside yakorewe abatutsi mu Rwanda mu mwaka wa 1994, basaga miliyoni imwe , ariko abarokotse kuri ubu bakaba bafite ikibazo cyo kuba batishyurwa imitungo yabo yangijwe muri cyo gihe.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru