Thursday . 19 September 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

RSB yahumurije abafite impungenge zo kwanduzwa n’amazi yo muri pisine

Thursday 25 July 2019, by : MUTESI Scovia
    Yasomwe na

Yashyizweho na: Imfurayabo Pierre Romeo

Mu gihe bamwe bibaza uburyo isuku yo mu bwogero (Swimming Pool/Piscine) yitabwaho; bagaragaza impungenge z’uko abogeramo bashobora kwanduzanya indwara, Ikigo k’Igihugu gitsura Ubuziranenge (RSB) kiratangaza ko hari amabwiriza yashyizweho hagamijwe kubungabunga ubuzima bw’ababwogeramo kandi ko ku bufatanye n’izindi nzego hakorwa ubugenzuzi harebwa ko yubahirizwa.

Nshimiyimana Claude utuye mu Mujyi wa Kigali akunze kujya mu bwogero, yagize ati: “Nkunda kujyayo, nta kibazo ndahagirira ariko impungenge ntizabura, kuko hari igihe duhuriramo turi abantu benshi kandi ntiwamenya indwara bafite mu gihe zitagaragara inyuma. Gusa akenshi njyayo mu masaha mba nizeye ko hatari abantu benshi. Ibyo ari byo byose bafite uburyo basukura ariya mazi, ntekereza ko hari n’inzego zishinzwe kubigenzura.”

Mu kiganiro n’Imvaho Nshya Nshizirungu Fabien ushinzwe gukurikirana amabwiriza y’ubuziranenge arebana n’amazi, isukura no kubungabunga ibidukikije muri RSB, yatangaje ko amabwiriza y’ubuziranenge (RS 189) yagiyeho kuva mu 2013, ariko yavuguruwe muri uyu mwaka wa 2019; agaragaza ibipimo by’amazi agomba gukoreshwa mu bwogero.

Yasobanuye ko mu birebana n’imyubakire y’ubwogero umuntu ashobora kubikora mu buryo ashatse ariko igihe ashyizemo amazi agomba gukurikiza ibipimo ntarengwa by’imiti iyasukura.

Yagize ati: “Umuntu ashobora kubaka ubwogero mu buryo ashaka, akabasha gutandukanya ahogera abantu bakuru n’abatoya, ariko niba ashyizemo amazi kugira ngo umuntu ayogemo ntihagire ingaruka amugiraho agomba kuba afite ibihe bipimo? Ni ukuvuga ngo ugeze ku bwogero ufite ubushobozi bwo gupima wapima iki kugira ngo umenye ko ayo mazi ugiye kogamo ari mazima? ”

Yakomeje abisobanura agira ati: “Amazi ashobora kuba ari ubururu kubera ko bashobora kuba bashyizemo ibara runaka cyangwa kubera ko amakaro ashashemo afite ibara ry’ubururu,…ukaba wagira ngo amazi ni meza ariko wayashyira nko mu kirahure ugasanga arasa nabi. Ni yo mpamvu hashyizweho ibipimo byerekana amazi yo kogamo uko agomba kuba ameze”.

Avuga ko ariya mabwiriza atanga ibipimo fatizo bishobora kwereka umuntu ko yayogamo akayavamo nta kibazo.

Zimwe mu ngero z’ibipimo by’ubutabire zigaragaza ko amazi agomba kuba afite pH ( Potantiel Hydrogène) iri hagati ya 7,2 idashobora kurenga 8,0, ku bijyanye n’imiti (Cl/Chlore) isukura, mu mazi hagomba kubonekamo igipimo cya 1,5 kitarenze 3,0 .

Nshizirungu ati: “Niba abantu bagiye muri ariya mazi byanze bikunze bashobora gusigamo mikorobe, ni yo mpamvu hagomba kuba harimo umuti utuma izo mikorobe zigiye mu mazi zishobora guhita zipfa cyangwa zigatakaza ubushobozi ku buryo hagize uyanywa bimutunguye ntacyo yamutwara”.

Avuga ko ibipimo by’imiti ishyirwamo iyo birenze ibiteganywa n’amabwiriza bishobora kugira ingaruka ku ruhu rw’abantu barimo koga, rukaba rwashishuka.

Nyiri ubwogero asabwa guhora agenzura ibipimo yabona bidahuye n’ibisabwa aba agomba guhita ahindura ayo mazi cyangwa akayayungurura akayasubizamo.

Ati: “Ufite ubwogero hari ibipimo agomba kubanza gupima mbere y’uko abantu bajya mu mazi”.

Nshizirungu avuga ko n’ugiye koga afite ibikoresho byifashishwa mu gupima ashobora kubikora ariko inshingano ziri kuri nyiri ubwongero, ari we ugomba kubwitaho.

Nubwo RSB ifite agashami kajya gasura amahoteri kareba uko iby’ubuziranenge bihagaze hakarebwa n’iby’ubwogero hakaba hafatwa n’ibipimo by’uko amazi akoreshwa yujuje ibisabwa, ik’ibanze iki kigo gikora ni gushyiraho amabwiriza.

Kugenzura uko amabwiriza ashyirwa mu bikorwa ahanini bikorwa n’izindi nzego zifite aho zihuriye n’isuku, zikanareba uburyo amazi ahindurwa n’igihe agomba guhindurirwa.

Uburyo bwo kugenzura uko amabwiriza yubahirizwa

Mugabo John ushinzwe imicungire n’imitunganyirize y’umwanda, mu Mujyi wa Kigali nka hamwe mu haboneka umubare utari muto w’ubwogero, yatangaje ko hari amabwiriza akurikizwa ya RSB ariko n’Umujyi wa Kigali ufite ay’isuku arimo n’arebana n’ubwogero.

Avuga ko ku bwogero by’umwihariko bareba uko ibipimo byashyizweho na RSB bihagaze, bakareba igihe ibyo bipimo abatanga serivisi z’ubwogero babifatiye, igihe imiti isabwa bayishyiriyemo, bakareba igihe amazi yagiriyemo n’igihe bagomba kuyakuriramo.

Ati: “Nibura nyuma y’amezi atatu amazi agomba kuba yahinduwe, hagati aho kandi bagomba kuba bashyiramo imiti yica mikorobe”.

Yakomeje agira ati: “Ubugenzuzi burakorwa kugira ngo harebwe ko ibyo byose byubahirizwa, umuntu ku giti ke ashatse kwigenzurira bishobora kugorana ariko ashobora kureba ku nkengero z’ubwogero aho amazi agarukira akenshi iyo harimo umwanda ashobora kubibona, hari n’aho ushobora kubona amakaro yirabura kandi yakagombye kuba ari umweru”.

Yasobanuye n’ibindi bigomba kwitabwaho, ati: “Abafite ubwogero bagomba gushyiramo imiti nibura hagashira isaha imwe cyangwa amasaha abiri abantu bakabona kogeramo kugira ngo imiti ibanze ikwirakwire mu mazi.”

Avuga ko imbogamizi zijya zigaragara rimwe na rimwe ari uko hari aho usanga bashyizemo umuti muke cyangwa mwinshi, uwogeyemo akaba yakumva hari impinduka, ariko ngo ntibikunze kubabo.

Ku birebana n’abafite impungenge z’aho amatorero abatiriza akenshi usanga haba hateye nk’ubwogero, avuga ko bajya kuhagenzura ariko ho baba batagendera ku bipimo by’ubwogero busanzwe bitewe n’uko abantu batajyamo buri munsi, bashyiramo imiti igihe bagiye kubatiza.

Nsengiyumva Barakabuye ukuriye Ihuriro ry’abatanga serivisi z’amahoteri, resitora n’ibirebana n’imyidagaduro mu Rwanda, yagarutse ku mabwiriza abajya koga bagomba gukurikiza, anashimangira ko abatanga serivisi z’ubwogero bajya batungurwa bagakorerwa ubugenzuzi hakarebwa niba bubahiriza amabwiriza ahari.

Yagize ati: “Nko ku bana bato, amabwiriza avuga ko bagomba kuba bari kumwe n’ababyeyi babo no kwirinda ko hari ibintu bakora bidakwiye mu gihe bari mu mazi”.

Yongeyeho ko umuntu ufite uburwayi bugaragara inyuma nk’ibicurane cyangwa se ibindi bishobora kuba byakwanduza abantu, aba atemerewe kujya muri ayo mazi. Ugiye koga asabwa kugira isuku kandi yanavamo akaba afite aho akarabira hafite isuku.

Ku bwogero hagomba kuba hari umukozi ubihugukiwe ukurikirana ibirebana n’ubwandu bw’amazi.

Bitewe n’ingano y’ubwogero ikigo gifite n’umubare w’abakigana, kishyiriraho amabwiriza yiyongera ku yandi ari rusange yashyizweho na RSB.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru