Saturday . 16 November 2019

INKURU ZIGEZWEHO

  • 4 June » Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo – read more
  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more

Rubavu: Ibigo mbonezamikurire byazahuye ubuzima bw’abana basigwaga ku mupaka uhuza u Rwanda na DR Kongo

Tuesday 4 June 2019, by : MUTESI Scovia
    Yasomwe na

Ubusanzwe kuri uyu mupaka habaga hari abana bato cyane basizwe n’ababyeyi babo bagiye gushaka imirimo muri Kongo. Benshi muri aba bana babaga bakiri ku ibere, kandi barerwa n’abandi bana nabo bakiri bato, aho wasangaga izuba cyangwa imvura bitaboroheraga, dore ko nta n’inzu yabagenewe bugamagamo.

Mu mwaka wa 2017 ubwo uwari Minisitiri w’Uburinganire n’Iterambere ry’Umuryango, Nyirasafari Esperance yasuraga abana basigwaga ku mupaka muto uhuza umujyi wa Gisenyi n’uwa Goma yasabye ko hashyirwaho irerero ry’abana ndetse n’ibigo mbonezamikurire y’abana kugira ngo ababyeyi bajye basiga abana babo ahantu hazwi ndetse bitabweho ku buryo bukwiye.

Nsimiyimana Ausen, umwe mu babyeyi wasigaga umwana we ku mupaka, avuga ko umwana we yari yarazonzwe n’indwara ariko ngo ubu aho agereye mu rugo mbonezamikurire ubuzima bwabaye bwiza
Ati "Najyaga muri Kongo, umwana nkamusigira undi mwana ku mupaka n’ibyo kurya, ariko umwana wanjye yahoraga arwaye, yuzuyeho indwara zituruka ku mwanda nk’ uruheri, kuburyo mu kwezi namuvuzaga nka kane cyangwa gatanu.

Ubu rero aho muzaniye muri ECD bamuha ubumenyi, bamutoza isuku, ndetse baranamugaburira kuburyo iyo tuganira mba numiwe n’uruzungu avuga.”

Yamfashishe Donatille nawe ashimira ECD ngo kuko yaje ari igisubizo. Ati "Abana banjye birirwaga mu muhanda nta suku, ibyo kurya nabasigiye byaribwaga n’abandi bana. Aho nabaga ndi muri Kongo umutima wanjye wabaga uhagaze cyane cyane igihe imvura yabaga yaguhe, narazaga ngasanga umwana wanjye yishwe n’umusongo.

Uyu munsi rero ndashima Imana ko umwana wanjye ubu ari hano mu rugo mbonezamikurire cya Madjengo, yitaweho neza kandi niyo natinze ndi mu kazi umwana wanjye menya aho ndamusanga.”
Urugo mbonezamikurire rwa Madjengo rwakira abana bagera kuri 200 bari mu kigero cy’imyaka itatu kugera kuri itandatu birirwaga ku mupaka barerwa n’abandi bana
Umutoni Claudette, umukorerabushake mu rugombonezamikurire rwa Madjengo avuga ko kwigisha umwana wabaye ku muhanda igihe kirekire bisaba imbaraga ugereranyije n’umwana uvuye mu muryango atarabaye mu muhanda.

Ati “Benshi mu bana twakiraga babaga bavanywe ku mupaka, babaga baragwingiye, bafite imirire mibi, barasahajwe n’indwara z’isuku nke, ndetse abandi bafite indwara zikomeye zirimo iz’ubuhumekero kubera kwirirwa hafi n’imodoka zisohora ibyotsi bihumanya ikirere."

Akomeza avuga ko ubwonko bw’umwana utarigeze yonka bihagije mu gihe ababyeyi be babaga bagiye muri Kongo biri mu byabagoraga kugira ngo umwana bamuvane mu cyiciro kimwe bamujyana mu kindi.
Munezero Patrick, umwana w’imyaka itanu urererwa mu rugo mbonezamikurire rwa Madjengo mu ijwi ryuje umunezero mwishi ari kumwe n’umubyeyi we avuga ko yishimira kuba yiga neza kandi akabasha no kubona ubuzima bwiza.

Ati "Umwarimu wacu atwigisha neza, gukundana, no gukunda gukora aduha ibiryo n’igikoma cya sosoma”
Mu bigo mbonezamikurire bitanu umunyamakuru yabashije kugeramo mu karere ka Rubavu byose urasanga abakorerabushake bari kumwe n’abana mu ishuri, bagenda babasubirishamo ibyo bababwiye ni mu gihe abana usanga ari intyoza mu kubara, kuririmba, gusenga, gukaraba intoki, kuvuga utuganiro two gufata mu mutwe, gukina n’ibindi."

Sheik Ngiruwonsanga Said, umuhazabikorwa w’urugo mbunezamikurire rw’abana bato Madjengo avuga ko benshi mu bana bakiriye bari bafite ibimenyetso by’imirire mibi kuri uyu munsi ngo nta n’umwe ukigaragaraho ibyo bibazo
Ati "Aba bana twabakuye ku muhanda aho birirwaga bicwa n’inzara nta gikoma cyangwa ibiryo, ariko uyu munsi abana babona igikoma ku gihe kandi bakabona ifunguro ryiza byiyongera ku nyigisho nziza abarezi bacu babahereza.”

Uwampayizina Marie Grace umuyobozi w’Akarere ka Rubavu wungirije ushinzwe imibereho myiza avuga ko imibare y’abana bagwingiye yari hejuru cyane ku bana basigwaga n’ababyeyi babo ku mupaka bikaba nyir’abayazana wo gutuma akarere gakomeza kuba kuri 46% mu kugira abana bafite ikibazo cy’imirire mibi.

Ati "Rero ntabwo twashoboraga kugabanya iyi mibare tutabifashishijwemo n’ibigo mbonezamikurire cyane cyane kubana twari dufite bagwingiye abandi bari mu mirire mibi. Mu bigo mbonezamikurire umubyeyi yigishwa ibijyanye n’ubuzima ku ruhande rwe, isuku, ndetse bikagenda bikagera ku mwana aho atangira gutegurwa mu bwenge kugira ngo azakure atyaye mu bwenge."

Akomeza avuga ko mu bana 282 bagaragaraho imirire mibi ubu basigaranye 49 bari mu ibara rituruka kandi nabo bari kwitabwaho bahabwa servisi zo kwa muganga, ifu ya Shisha Kibondo n’amata.”

Umuhuzabikorwa wa Porogaramu y’Igihugu Mbonezamikurire y’abana bato, Dr. Anita Asiimwe asaba ababyeyi gukurikirana ubuzima bw’umwana kuva bakimusama kuko bimurinda kugwingira, umwana akagaburirwa indyo yuzuye igizwe n’imboga n’imbuto, ibitera imbaraga, ibyubaka umubiri n’ibirinda indwara.

Ubusanzwe akarere ka Rubavu kagaragaza ko gafite ibigo mbonezamikurire 164

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru