Tuesday . 15 October 2019

INKURU ZIGEZWEHO

  • 7 August 2018 » Uganda:Iperereza ryagaragaje ko Kayihura ushinjwa kwica Kaweesi nta shingiro bifite – read more
  • 4 August 2018 » Minisitiri Mushikiwabo yagaragaje imigabo n’imigambi nk’umukandida wa OIF – read more
  • 17 July 2018 » How immigrants helped France win the World Cup – read more
  • 23 April 2018 » Pascal Nyamurinda wayoboraga Umujyi wa Kigali yeguye ku mirimo ye – read more
  • 23 April 2018 » Minisitiri Musoni James Yakuwe Muri Guverinoma – read more

U Rwanda ntiruzongera kujya gupimisha DNA mu mahanga

Thursday 7 June 2018, by : MUTESI Scovia
    Yasomwe na

Kuri uyu wa kane tariki ya 7 Kamena, Polisi y’u Rwanda yashyikirije Ikigo cy’Igihugu gishinzwe gupima ibimenyetso by’ubumenyi n’ubuhanga byifashishwa mu butabera kizwi nka “Rwanda Forensic Laboratory” ibikoresho n’abakozi kizifashisha mu mirimo yacyo ya buri munsi.

Iki kigo cyangwa se Laboratwari; cyahoze muri Polisi y’u Rwanda guhera mu mwaka wa 2005 kizwi nka “Kigali Forensic Laboratory”. Leta yasanze ari ngombwa ko kivugururwa kigatezwa imbere kandi kikongererwa n’inshingano ndetse n’ububasha, maze mu mu kwezi k’Ukwakira 2016 gihindurwa Laboratwari y’Igihugu ipima ibimenyetso bifasha mu bijyanye n’ubutabera nk’uko bikubiye mu itegeko rigishyiraho nimero 41/2016.

Minisitiri w’Ubutabera, akaba n’intumwa Nkuru ya Leta, Johnston Busingye, ubwo yari mu muhango w’ihererekanyabubasha hagati y’Ubuyobozi Bukuru bwa Polisi y’u Rwanda n’ubw’iki Kigo; yavuze ko iki Kigo kiri ku rwego mpuzamahanga ku buryo ibyo gikora unabisanga no mu bihugu byateye imbere.

Yagize ati,"Iyi Laboratwari ifite ibikoresho byo ku rwego rwo hejuru kandi by’ikoranabuhanga mu gupima ibimenyetso. Ikindi kandi ifite abakozi bafite ubumenyi buhagije n’inyubako zigezweho, ku buryo gupima ibizamini ndetse no kubona ibisubizo byabyo byihuta kandi bigashingira ku ikoranabuhanga rigezweho."

Minisitiri Busingye yakomeje avuga ko Abanyarwanda bategereje byinshi kuri iki Kigo kuko ubusanzwe byinshi mu bizamini byakorwaga mbere y’uko kijyaho byoherezwaga hanze y’Igihugu gusuzumirwayo cyane cyane mu bihugu byo ku mugabane w’i Burayi. Yasabye buri wese gushyigikira imikorere n’imigendekere myiza yacyo mu kazi ka buri munsi.

Umuyobozi Mukuru wa Polisi y’u Rwanda, IGP Emmanuel K Gasana we mu ijambo rye, yavuze ko habayeho urugendo rurerure mu gushyiraho iki Kigo; akomeza avuga ko biri mu murongo wo guteza imbere ubutabera.

IGP Gasana yavuze kandi ko iri suzumiro ryo ku rwego rwo hejuru rizafasha mu bijyanye n’ubugenzacyaha, ubushinjacyaha ndetse no mu bucamanza kubera ibimenyetso simusiga bizaba byasuzumanywe ubushishozi n’ubuhanga.

Yakomeje avuga ko bizafasha gushaka no gusuzuma ibimenyetso by’ibyaha bikorwa hifashishijwe ikoranabuhanga rijyanye n’aho isi igeze.

Yasoje avuga ko Polisi y’u Rwanda izakomeza gukorana n’iki Kigo mu kubaka ubushobozi bwacyo, dore ko hari n’Ishami mu Ishuri rikuru rya Polisi y’u Rwanda mu karere ka Musanze-NPC ryigisha abapolisi ibijyanye n’ubumenyi mu gukusanya no gusuzuma ibimenyetso by’ibyaha byifashishwa mu butabera.

Umuyobozi w’iki Kigo cya Rwanda Forensic Laboratory, ACP Dr Francois Sinayobye, mu ijambo rye yagarutse kuri serivisi zihatangirwa zirimo; gupima uturemangingo DNA tw’umuntu ukekwaho ibyaha ku buryo bihuzwa n’aho icyaha cyabereye, gupima ibishobora guhumanya umuntu mu gihe yarozwe cyangwa yasinze birengeje urugero, gupima ubwonko bw’umuntu n’ibiyobyabwenge yanyonye cyangwa yiteye mu mubiri, gupima no guhuza ibimenyetso by’imbunda n’ahakorewe icyaha, gusuzuma imirambo hifashishijwe ubuhanga mu gihe umuntu yakorewe ihohotera rishingiye ku gitsina cyangwa yakubiswe n’ibindi.

ACP Dr Sinayobye yavuze kandi ko bazanakorana n’ibigo bitandukanye birimo iby’ingororamuco mu gufasha gukumira no kumenya abakoresha ibiyobyabwenge hagamijwe kubagorora no kubasubiza mu buzima busanzwe no gukumira ibyaha muri rusange.

Mu muhango w’iryo hererekanyabubasha, Polisi yashyikirije iki Kigo inyubako ebyiri zizakorerwamo n’abakozi bacyo hamwe n’Abapolisi 52 bafite ubumenyi bwihariye mu gupima ibimenyetso by’ibyaha n’ibindi bikoresho by’akazi.

feature-top
feature-top

Any message or comments?

Iyandikishe ujye ubona Amakuru

Iyandikishe ujye ubona Amakuru