Mama U rwagasabo

Perezida w'u Burundi yaragije Imana igihugu cye nyuma y'uko ububiko bw'intwaro z'igisirikare cy'u Burundi bufashwe n'inkongi y'umuriro

Valens Nzabonimana — 2026-04-01T08:35:34Z

Iyi nkongi yabaye mu ijoro ryo ku wa 31 Werurwe, yibasiye ububiko bw'intwaro buri mu kigo cya gisirikare kizwi nka ‘Base', giherereye mu gace ka Musaga i Bujumbura.

I Burundi mu ijoro ryo kuwa 31 Werurwe 2026, humvikanye urusaku rw'ibiturika.

Igisirikare cy'u Burundi na Minisiteri y'Umutekano w'imbere mu gihugu, byatangaje ko iyi nkongi yaturutse ku kibazo cy'umuriro w'amashanyarazi.

Mu butumwa Perezida Ndayishimiye yashyize ku rubuga nkoranyambaga rwa X, mu ijoro ryo ku wa 31, yihanganishije Abarundi, ndetse asaba Imana kubana n'u Burundi.

Ati “Nihanganishije abagize ibyago biturutse ku muriro wadutse mu bubiko bumwe bw'ikigo cya gisirikare iri muri Zone Musaga. Duhumurije Abarundi bose: Inzego z'igihugu ziri gukora ibishoboka byose kugira ngo zitabare kandi zikomeje kurinda ubusugire mu buryo. Imana irinde u Burundi.”

ISRAEL YEMEJE IBITERO MURI LIBAN NA IRAN ICYARIMWE

Chadadi Habimana — 2026-03-03T08:03:32Z

Ingabo za Israel zemeje ko zarashe ku murwa mukuru wa Iran, Tehran na Beirut muri Liban kuri uyu wa kabiri mu gitondo.

Mu itangazo igisirikare cya Israel cyagize kiti: “Ingabo za Israel ubu ziri kurasira rimwe ibirindiro bya gisirikare i Tehran na'i Beirut”.

Umuvugizi w'ingabo za Israel ukoresha Icyarabu Avichay Adraee yavuze ko barimo gukora ibitero bikomeye byo mu kirere.

Ibi bitero byabaye isaha imwe nyuma yuko IDF isohoye “itangazo riburira kandi ryihutirwa” kubaturage bo mu duce tw'ibyaro tw'amajyepfo ya Beirut, no mu midugudu itandukanye babakangurira guhunga.

IDF yavuze ko iri kwibanda cyane ku bigo by'abategetsi n'ahabikwa ibikoreso bya Hezbollah.

Chadadi Habimana

Ubumwe bw'Uburayi (EU) yatangaje ko itazemera izamurwa ry'imisoro ku bicuruzwa byoherezwa muri Amerika nyuma y'icyemezo cy'Urukiko rw'Ikirenga

Valens Nzabonimana — 2026-02-23T10:47:09Z

Komisiyo y'Ubumwe bw'Uburayi yatangaje ko nta zamurwa ry'imisoro (tariffs) izemera ku bicuruzwa byoherezwa muri Leta Zunze Ubumwe za Amerika, nyuma y'uko Urukiko rw'Ikirenga rwa Amerika ruhagaritse amategeko yari yemereye Perezida Donald Trump gushyiraho imisoro ya rusange ku mbuto zose ziva mu mahanga.

Nyuma y'icyo cyemezo, Perezida wa Leta zunze ubumwe z'Amerika yashyizeho misoro mishya ya 10% ku bicuruzwa byose byinjira mu gihugu, kugera kuri 15% umunsi wakurikiyeho. Ibi byateje impaka kuko bitajyanye n'amasezerano y'ubucuruzi Ubumwe bw'Uburayi ndetse na Leta Zunze Ubumwe za Amerika yo mu mwaka ushize, yari yashyizeho 15% ku misoro ku bicuruzwa byinshi byoherezwa n'Ubumwe bw'Uburayi, hamwe n'imisoro ya 0% ku bindi.

Komisiyo y'Ubumwe bw'Uburayi ivuga ko ibi byemezo bidahuye n'amabwiriza y'amasezerano kandi bishobora guteza ikibazo ku masoko y'imari n'ibikorwa by'ubucuruzi. Yongeyeho ko Ubumwe bw'Uburayi buteze amatwi ibisobanuro byuzuye ku byo Amerika izakora nyuma y'icyemezo cy'urukiko, ariko ko “amasezerano ari amasezerano” kandi ko kuzamura imisoro ku rwego rwo hejuru bitazemerwa.

Amasezerano y'ubucuruzi yashyizweho yari agamije kongera ubwizerane mu bucuruzi hagati y'ibihugu byombi, aho Ubumwe bw'Uburayi na Amerika bari bemeranyije kugabanya imbogamizi z'imisoro ku byoherezwa mu mahanga kugira ngo ubucuruzi bubere inyungu impande zombi.

SAUALA SANDRA TUMUKUNDE

U Burusiya bwakiriye Intwaro n'Amasasu menshi mu kwezi kwa Mutarama

Valens Nzabonimana — 2026-02-04T08:55:25Z

Minisitiri w'Ingabo w'u Burusiya, Andrey Belousov, yatangaje ko mu kwezi kwa Mutarama konyine, ingabo z'u Burusiya zakiriye intwaro zirenga 10,000 n'amasasu agera kuri miliyoni ebyiri, byinjiye mu mirimo ya gisirikare.

Ibi yabivugiye mu nama yayoboye igamije gusuzuma uko gahunda yo gutanga ibikoresho bya gisirikare igenda ishyirwa mu bikorwa. Belousov yavuze ko izi ntwaro n'amasasu byatangiye gukoreshwa n'ingabo z'u Burusiya, bikaba bigaragaza ko umusaruro w'inganda z'intwaro ukomeje kwiyongera.

Nyuma y'iyo nama, Minisiteri y'Ingabo y'u Burusiya yatangaje ko mu mwaka wa 2026 hateganyijwe gutanga ibikoresho bya gisirikare birenga 310,000, hamwe n'amasasu agera kuri miliyoni 21. Ibi bikubiyemo imodoka za gisirikare, intwaro ziremereye n'izoroheje, n'ibindi bikoresho byifashishwa ku rugamba.

Minisiteri yakomeje ivuga ko izi gahunda zigamije kongera ubushobozi bw'ingabo z'igihugu no kuzituma zikomeza kuba ku rwego rwo hejuru mu bijyanye n'ibikoresho n'intwaro.

Abasesenguzi bavuga ko iyi mibare igaragaza ko u Burusiya bukomeje gushyira imbaraga nyinshi mu gisirikare cyabwo, cyane cyane mu gihe umutekano w'akarere n'isi muri rusange ukomeje kuba ikibazo gikomeye.

Saula Sandra Tumukunde

IMISORO YA TRUMP N'UMUGAMBI WO KWIGARURIRA GREENLAND BINYURANYIJE N'AMASEZERANO YA NATO

Chadadi Habimana — 2026-01-28T09:44:22Z

Ibyemezo bya Perezida wa Leta Zunze Ubumwe za Amerika, Donald Trump, byo kuzamura imisoro ku bihugu by'uburayi no gushaka kwigarurira Greenland byica ingingo ya 2 n'iya 3 z'amasezerano ya NATO.

Ingingo ya 2 isaba ibihugu bigize uyu muryango kwirinda amakimbirane mu bya politiki no guteza imbere ubufatanye mu by'ubukungu hagati yabyo, Gushyiraho imisoro ihanitse ku bihugu by'Uburayi bifatwa nk'ibibangamira iyo ntego.

Ingingo ya 3 yo isaba ibihugu bya NATO gukomeza no guteza imbere ubushobozi bwo kwirinda ibitero bya gisirikare. Umugambi wo kwigarurira Greenland, iki kirwa kigenzurwa na Denmark bishobora guteza umutekano mucye no guca intege ubufatanye bwa gisirikare muri NATO.

Nkuko iyi nkuru dukesha Politico ivuga ,Umunyamabanga Mukuru wa NATO, Mark Rutte, yibanze cyane ku ntego yo gukomeza Amerika muri NATO mu gihe cya Trump, kugira ngo itava mu mu ryango w'ubumwe bw'Uburayi. Icyakora, iyi nzira iramushyira mu majwi kuko ishobora kumutesha izindi nshingano zo kuyobora no kurengera inyungu rusange z'umuryango wa NATO.

Ibi byose byerekana umwuka mubi uri mu mubano wa Amerika n'u Burayi, ushobora kugira ingaruka ku by'Umutekano n'ubufatanye mpuzamahanga.

Yvette Niyigena

VENEZUELA YAKIRIYE AMAFARANGA YA MBERE YAVUYE MURI PETEROLI YAYO YAGURISHIJWE N'AMERIKA

Chadadi Habimana — 2026-01-21T08:13:56Z

Venezuela yakiriye amafaranga ya mbere akomoka ku igurishwa rya peteroli yayo ryakozwe na Leta Zunze Ubumwe za Amerika, nyuma y'uko Perezida Nicolas Maduro afashwe na Leta Zunze Ubumwe za Amerika mu ntangiriro z'uku kwezi kwa Mutarama.

Leta Zunze Ubumwe za Amerika zatangaje mu cyumweru gishize ko zarangije kugurisha peteroli ya Venezuela ku gaciro ka miliyoni 500 z'amadolari ya Amerika.

Umuyobozi w'agateganyo wa Venezuela, Delcy Rodríguez, yagize ati: “Turabamenyesha ko twabonye amafaranga aturutse ku igurishwa rya peteroli, kandi mu mafaranga ya mbere angana na miliyoni 500 z'amadolari, tumaze kubona miliyoni 300.” Ibi yabivugiye mu muhango wabereye i Caracas ku wa Kabiri.

Rodríguez yatangaje ko ayo mafaranga ya mbere angana na miliyoni 300 z'amadolari(angana na miliyoni 256 z'amayero) azakoreshwa mu gufasha kuzahura ifaranga ry'igihugu ryari ryarahungabanye bikomeye, bolivar.

Yagize ati ayo mafaranga azakoreshwa mu kubungabunga isoko ry'ivunjisha ry'amafaranga kugira ngo “harindwe umushahara n'ubushobozi bwo kugura bw'abakozi bacu.”

Ibisobanuro birambuye ku bijyanye n'igurishwa rya peteroli ryakozwe na Leta Zunze Ubumwe za Amerika ntibiramenyekana neza. Gusa, ibiro ntaramakuru by'abongereza Reuters byatangaje ko icyo gihe peteroli ya Venezuela yagurishijwe ku giciro gito ugereranyije n'iyo mu bindi bihugu, hagamijwe kuyishakira abaguzi bayigura.

Hagati aho, abadepite ba Venezuela biteganyijwe ko baza kuganira no kujya impaka ku bigendanye n'ivugururwa ry'urwego rwa peteroli muri iki cyumweru.

Ivugururwa riteganyijwe ririmo kugabanya ububasha bukomeye bw'ikigo cya Leta gishinzwe peteroli na gaze, PDVSA, ku bijyanye n'ishoramari rishya.

Ubu itegeko ry'igihugu rigenga iby'umutungo kamere wa peteroli (hydrocarbures) risaba ko abafatanyabikorwa b'abanyamahanga bakorana na PDVSA, kandi iki kigo cya Leta kikagira imigabane myinshi (majority stake) muri iyo mishinga.

Chadadi Habimana

IMPANUKA YA GARIYAMOSHI YAHITANYE UMUNTU UMWE MURI ESPAGNE

Chadadi Habimana — 2026-01-21T07:57:18Z

Nibura umuntu umwe yapfuye naho abandi benshi barakomereka nyuma y'impanuka yabaye ku mugoroba wo ku wa Kabiri, ubwo gari ya moshi itwara abagenzi yakoraga impanuka hafi ya Barcelona muri Espagne.

Iyo gari ya moshi yagonganye n'urukuta rufata ubutaka (retaining wall) rwari rwaraguye rukagwa ku muhanda wa gari ya moshi hafi y'umujyi wa Gelida, uri nko muri kilometero uvuye mu mujyi wa Barcelona.

Ibinyamakuru byo muri ako gace byatangaje ko umushoferi wa gari ya moshi ari we wapfiriye muri iyo mpanuka. Mu itangazo ryashyizwe ku mbuga nkoranyambaga, serivisi z'ubutabazi zo muri Catalonia zatangaje ko abantu 37 bakomerekejwe niyo mpanuka, barimo batanu bakomeretse bikomeye.

Iyi ni impanuka ya gatatu ya gariyamoshi mu minsi itatu muri Espagne.

Ambulansi zigera kuri 20 zoherejwe aho impanuka yabereye, maze abakomeretse bajyanwa mu bitaro bitatu byo muri ako gace.

Urwego rushinzwe kuzimya inkongi z'umuriro muri Catalonia rwatangaje ko “nta muntu n'umwe wasigaye imbere muri gari ya moshi,” ariko ruri gukomeza gusaka munsi yayo no mu bice biyikikije kugira ngo harebwe ko nta bandi bashobora kuba bakomeretse.

Urukuta rufata ubutaka rushobora kuba rwaraguye bitewe n'imvura nyinshi yaguye muri iki cyumweru mu gace ka majyaruguru y'iburasirazuba bwa Espagne, nk'uko byatangajwe n'ikigo cya Leta gishinzwe gari ya moshi muri Espagne, ADIF.

ADIF kandi yatangaje ko ingendo za gari ya moshi zitwara abagenzi (commuter trains) kuri iyo nzira zahagaritswe by'agateganyo.
Ikinyamakuru El País cyo muri Espagne cyatangaje ko ku mugoroba wo ku wa Kabiri habaye indi mpanuka ya gari ya moshi.

Iyo gari ya moshi yakoraga urugendo hagati ya sitasiyo za Blanes na Maçanet, na zo ziri mu gace ka Catalonia, yavuye ku murongo wayo (derailment), ariko nk'uko El País ibivuga, nta muntu n'umwe wakomeretse muri iyo mpanuka.

Iyo mpanuka yatewe n'amabuye yaguye ku murongo wa gari ya moshi bitewe n'inkubi y'umuyaga n'imvura nyinshi byibasiye ako gace ku wa Kabiri.

Chadadi Habimana

TRUMP YAMAGANYE UBWONGEREZA BUGIYE GUHA IBIRWA BYA CHAGOS IGIHUGU CYA MAURITIUS

Chadadi Habimana — 2026-01-20T08:01:18Z

Perezida Trump yatangaje ko umugambi w'ubwongereza wo kurekurira ikirwa cya Mauritius, ibirwa bya Chagos abyita igikorwa cy'ubucucu buhambaye, nkuko bigaragara ku rubuga rwe akunze kunyuzaho amakuru rwa Truth Social.

Yashimangiye ko uwo mugambi w'ubwongereza wo kwambura Amerika ibirindiro bya gisirikari muri ako gace nubwo nke ngo zahaguma ariko gutanga ubusugire byo ntibyumvikana agashimangira ko ariyo mpamvu; Leta zunze ubumwe z'Amerika zifuza kwiyomekaho ikirwa cya Greenland.

Yanditse ati " Biteye agahinda, umufatanyabikorwa wacu w'imena muri OTAN, Ubwami bw'Ubwongereza kuri ubu buri gutegura gutanga ikirwa cya Diego Garcia, igice gifite umumaro ku birindiro bya gisirikari byacu, none bagiye kugiha Mauritius kubikora nta mpamvu nimwe ibirimo."

Muri Gashyantare 2025, Keir Starmer yagendereye Trump babyemeranyaho.

Ubutegetsi bwa Perezida Trump mu gihe cyashize bwari bwatangaje ko bushyigikiye uyu mugambi ndetse mu kwezi kwa gatanu umunyamabanga wa leta ushinzwe ububanyi n'amahanga wa Amerika, Marc Rubio yari yise kiriya gikorwa "indashyikirwa".

Minisitiri w'intebe w'ubwongereza; Sir Keir Starmer yari yatangaje ko gukodesha imyaka 99 icyo kirwa ngo gishyirweho ibirindiro bya gisirikari ariko ngo nyuma yo kugitanga bikaba bizajya bitwara arenga 101 z'amapound ku mwaka.

Ibi birwa byari byaratandukanyijwe na Mauritius mu mwaka w'1965, icyo gihe ikirwa cya Mauritius cyari kikiri mu maboko y'ubwongereza, nyuma ubwongereza bwaguze icyo kirwa kuri miliyoni zisaga 3 z'amapound gusa Mauritius yashimangiye ko ibyakozwe byari binyuranyije n'amategeko.

Ibirwa bya Chagos bisanzwe bibarizwaho ibirindiro by'ingabo z'Amerika.

Ubwongereza bwatumiye Amerika kuhubaka ibirindiro bya gisirikari ahitwa Diego Garcia byatumye abari bahatuye ku bwinshi bakurwa mu nzu zabo.

Bamwe bimuriwe muri Mauritius na Seychelles gusa abandi batujwe mu bwongereza cyane cyane mu bice bya Crawley mu burengerazuba bwa Sussex.

Chadadi Habimana

ABANTU 39 BAGUYE MU MPANUKA YA GARIYAMOSHI MURI ESPAGNE

Chadadi Habimana — 2026-01-19T11:17:42Z

Nibura abantu basaga 39 nibo byamenyekanye ko baguye mu mpanuka ya gariyamoshi zihuta (High Speed Train) mu murwa mukuru Madrid.

Gariyamoshi ebyiri zagonganye zijya mu byerekezo bitandukanye.

Iyi mpanuka yabaye nyuma yaho indi gariyamoshi yinjiye mu nzira itariyo igahita igongana niriya yindi yavaga mu kindi cyerekezo ahitwa Adamuz.

Iyi mpanuka yabaye mu ma saa moya z'ijoro zaho muri Spain, nyuma y'igihe kigera kw'isaha iyo gariyamoshi ihagurutse ahitwa Malaga yerekeza i Madrid ku murwa mukuru.

Benshi mu bapfuye n'abakomeretse bari mu myanya y'imbere muri gariyamoshi ya kabiri yo yerekeza mu bice by'amajyepfo aho yavaga i Madrid yerekeza ahitwa Huelva, Kampanyi ya Gariyamoshi, Iryo yatangaje ko hakomeje iperereza kugirango hamenyekane icyabaye kuko iyi gariyamoshi yari yubatswe mu 2022 ikaba yari yanakorewe isuzuma mu minsi ine yari yabanje.

Ibikorwa by'ubutabazi byahise bitangira ku buryo bwihuse.

Minisitiri w'ubwikorezi muri Espagne; Oscar Puente yatangaje ko uburyo impanuka yabayemo butangaje kuko bitumvikana ukuntu gariyamoshi ebyiri zajya mu murongo umwe ni ibintu yise "Agahomamunwa".

Minisitiri w'intebe wa Espagne yemeje ko asura ahabereye impanuka.

Inteko ishinga Amategeko ya Espagne yatangaje ko iri bufate umunota umwe wo guceceka mu rwego rwo guha icyubahiro abahitanywe niyo mpanuka, ni mu gihe Minisitiri w'intebe wa Espagne; Pedro Sanchez yatangaje ko agiye kugera ahabereye iyo mpanuka.

Iyi niyo mpanuka ikomeye ibaye muri Espagne mu myaka 10 ishize, amakuru avuga ko iyi gariyamoshi yari irimo abagera kw'ijana mu gihe yagonganaga n'indi.

Chadadi Habimana

Abayobozi b'Uburayi Baramagana Imisoro ya Trump ishingiye ku Kibazo cya Greenland

Chadadi Habimana — 2026-01-19T09:04:44Z

Abayobozi b'ibihugu by'Uburayi n'Ubumwe bw'Uburayi (EU) bagaragaje ukutishimira gukomeye iterabwoba rya Perezida wa Leta Zunze Ubumwe za Amerika, Donald Trump, ryo gushyiraho imisoro (tariffs) ku bicuruzwa bituruka mu Burayi, avuga ko ari igitutu agamije gushyirwa ku kibazo cya Greenland.

Trump yatangaje ko Amerika ishobora gutangira gushyiraho imisoro ya 10% guhera ku itariki ya 1 Gashyantare 2026, ikazamuka ikagera kuri 25% muri Kamena 2026, mu gihe ibihugu by'Uburayi bikomeje kwanga gushyigikira umugambi we wo kugira ijambo rikomeye ku miyoborere ya Greenland, ikirwa cyigenga kiri mu maboko ya Denmark.

Mu itangazo ryahuriweho n'abayobozi batandukanye, Uburayi bwavuze ko iyi myitwarire ya Trump ishobora gutuma umubano wa Amerika n'Uburayi winjira mu “mwiryane ushobora gukomeza kwiyongera”, kandi ko bidakwiriye ko abafatanyabikorwa bakuru mu bya politiki, ubucuruzi na gisirikare bakoresha igitutu cy'ubukungu.

Abayobozi bashimangiye ko Greenland ifite uburenganzira busesuye bwo kwifatira ibyemezo biyireba, kandi ko Denmark igomba gukomeza kubahwa nk'igihugu gifite ubusugire ku butaka bwacyo.

Perezida w'Ubufaransa, Emmanuel Macron, yavuze ko nta bwoba cyangwa igitutu cy'ubukungu gishobora gutuma Uburayi buhindura umwanya wabwo ku kibazo cya Greenland. Na ho abayobozi bo muri Sweden, Norway n'ahandi bavuze ko gukoresha imisoro nk'intwaro ya politiki bidakwiye mu mubano w'abagize NATO.

Ubumwe bw'Uburayi bwongeyeho ko ubucuruzi butagomba gukoreshwa nk'intwaro yo kwigomeka ku bihugu by'inshuti, cyane cyane mu bihe isi ihanganye n'ibibazo by'umutekano n'ubukungu.

Komisiyo y'Ubumwe bw'Uburayi yatangaje ko iri gusuzuma ingamba zishoboka mu gihe Amerika yashyira mu bikorwa iyo misoro, harimo no gushyiraho imisoro isubiza ku bicuruzwa bya Amerika, mu rwego rwo kurengera inyungu z'ibihugu bigize EU.

Abayobozi bavuze ko bagikomeje guha amahirwe inzira y'ibiganiro, ariko banasobanura ko Uburayi butazemera guhatirizwa ibyemezo binyuranyije n'amahame y'ubusugire bw'ibihugu.

Abasesenguzi b'ibi by'ubukungu n'imibanire mpuzamahanga bagaragaza ko iyi mvururu ishobora guhungabanya umubano w'imyaka myinshi wa trans-Atlantic, ikanagira ingaruka ku bufatanye mu bya gisirikare, ubucuruzi n'umutekano ku rwego rw'isi.