Minisiteri y’ingabo z’u Rwanda (MINADEF) yatangaje ko abasirikare ba Repubulika Iharanira Demokarasi ya Congo (FARDC) bafatanyije n’umutwe ushaka guhirika bw’u Rwanda wasize ukoze Jenoside yakorewe Abatutsi mu 1994 (FDLR) bashimuse abasirikare b’u Rwanda babiri, ku wa Mbere taliki 23, Gicurasi, 2022.
Itangazo ry’Ingabo z’u Rwanda (RDF) rivuga ko kiriya gikorwa ari icy’ubushotoranyi, bise mu Cyongereza Provocative Aggression.
Ingabo z’u Rwanda zivuga ko bariya basirikare ari Cpl Nkundabagenzi Elysée na Pte Ntwari Gad kandi ngo bashimuswe bari ku mupaka w’u Rwanda na Congo bacunga umutekano.
Itangazo ry’ingabo z’u Rwanda rivuga ko zizi neza aho bariya basirikare baherereye kandi rirasaba abayobozi ba Repubulika ya Demukarasi ya Congo kureka gukorana n’imitwe yakoze Jenoside yakorewe Abatutsi kandi bakarekura bariya basirikare.
RDF yahise isaba ko abasirikare bayo barekurwa mu mahoro.
