Abacuruzi b’inka bo mu karere karere ka Burera, by’umwihariko abarema isoko ry’amatungo ryo mu murenge wa Butaro barashinja kompanyi ya Ngali kubishyuza imisoro itagira inyemezabwishyu, icyo bakeka nk’amanyanga.
Aba bacuruzi babitangarije umunyamakuru wa mamaurwagasabo ubwo yageraga aho igiterane cy’inka kiri, asanga bishyura amafaranga mu ntoki badahabwa gitanse igaragaza ko bishyuye n’icyo bishyuriye.
Bavuga ko ndetse hari igihe bagera mu nzira babura inyemezabwishyu bakishyuzwa andi mafaranga.
Umwe muri aba bacurizi wanze kwivuga amazina yagiye ati:"Hano muri iri soko ry’amatungo nta gitanse baduha, ubwo iyo ugiye gusora ufata ibihumbi bitatu kuri buri nka ukayahereza uriya mukozi wa ngali, aba afite agakayi akwandikamo warangiza ukagenda, gusa hari igihe ugira ibyago waba ugeze hirya ugahura n’undi mukozi wa Ngali akakubaza aho wishyuriye. Iyo ubuze iyo gitanse nawe arongera akakwishyuza, iki kibazo kiraturemereye nk’abacuruzi b’amatungo dukeneye ubuvugizi."
Undi muturage witwa Twahirwa yagize ati: "Twarumiwe hano muri iri soko! Mbere twishyuraga ibihumbi bibiri kuri buri nka bakaduha gitanse, ariko ubu basigaye batwishyuza bitatu bitagira inyemezabwishyu, tukibaza impamvu bikorwa gutyo. Cyakoze bandika amazina mu ikayi. Turasaba ko bajya baduha inyemezabwishyu nyuma yo kwishyura kuko ibi bikorwa tubifata nk’amanyanga."
Bakomeza bavuga ko bibaza n’impamvu umusoro bawuzamuye ukava ku bihumbi 2000 ugashyirwa ku 3000 nta gisobanuro, kandi ngo waratisha (wabura umuguzi) inka utigeze ucuruza nabwo ugasora, ibi nabyo ngo bikomeje kubateza igihombo gikomeye.
Umunyabanga nshingwabikorwa w’umurenge wa Butaro, Bwana Kayitsinga Faustin avuga ko iki kibazo kijyanye no kwishyura ntanyemezabwishyu agiye kugikurikirana, ngo nibwo yakimenya.
Yagize ati: "Turaza kubikurikirana, sinavuga ko ibyo muvuze atari byo ariko ubusanzwe hariya mu isoko haba abakozi ba Ngali, nibo bafata imisoro kandi iyo bafashe imisoro bajya kudekarara ku buryo kugira ngo buri wese abone inyemezabwishyu. Habaye hari ukora ayo makosa yo kudatanga inyemezabwishyu byaba ari ikibazo ku buryo byaza gukosorwa bakajya bacuruza bishimye."
Ku kijyanye n’umusoro abacuruzi bavuga ko wazamutse, Gitifu yavuze ko amafaranga yishyurwa aba yaragenwe n’itegeko, ndetse ngo habaye hari uwishyura amafaranga ataragenywe n’itegeko nabyo ngo byakurikiranywa bigakosorwa.
Yanditswe na Jean Claude Ndayambaje
