Yanditswe na Ndayambaje Jean Claude
Ikipe ya Mukura Victory Sports yo mu karere ka Huye yamaze gutangaza ko yahagaritse Umutoza Ruremesha Emmanuel, bikekwa ko icyatumye ahagarikwa ari umusaruro muke."
Ibi bibaye nyuma yo gutsindwa na Kiyovu Sports ibitego 2-1 mu mukino w’umunsi wa 9 wa Shampiyona wabaye kuri uyu wa Gatandatu, kuri stade mpuzamahanga ya Huye, ibintu bitavuzweho rumwe n’abakunzi ba Mukura bakomeje gukemangwa imitoreze ya Ruremesha.
Sadiki Eugene, Umuyobozi wa Mukura Victory Sports yahamirije itangazamakuru ko bahagaritse uyu mutoza nubwo ateruye ngo avuge impamvu, gusa birakekwako ari umusaruro muke.
Nanone kandi bamwe bakurikiranira hafi Mukura bavuga ko Ruremesha yaba yaritsindishije umukino bakinnyemo na Kiyovu sports akayiha amanota.
Kuri ubu ikipe ya Mukura victory sport imaze gukina imikino 8 ifite amanota 10 ku mwanya wa 9, ikaba kandi ifite ikirarane na APR fc.
Ruremesha Emmanuel yagiye muri Mukura avuye mu ikipe ya Gorilla fc, mbere yo kwerekeza muri Gorilla yari Umutoza wa Kiyovu sports .
Yasinyanye n’iyi Kipe amasezerano y’imyaka 2, mu gihe kandi Mukura ku munsi wa 10 wa shampiyona izaba yakiriwe na Gorilla fc itozwa na Sogonya Hamisi Cishi umaze gutoza imikino ibiri muri iyi Kipe akaba afite amanota 7.
