Zimurinda uyobora ishyirahamwe ry’umukino wa Chess mu Rwanda yatawe muri yombi

Yanditswe na Ndayambaje Jean Claude

Mu gitondo cyo kuri uyu wa Gatandatu nibwo ku mbuga nkoranyambaga hacicikanye amakuru avuga ko Zimurinda Ben Tom yatawe muri yombi n’Urwego rw’Igihugu rw’Ubugenzacyaha, RIB akekwaho kunyereza umutungo wa Federasiyo ya Chess yayoboraga.

Kuri ubu uyu muyobozi afungiwe kuri Station ya RIB ya Kicukiro kuva tariki ya 24 Gashyantare 2022. Ubwo twakoraga iyi nkuru nta makuru arambuye kuko hagikorwa ipereza ryimbitse.

Kuri uyu wa Gatandatu kandi nibwo hari hategerejwe uruzinduko ry’Umuyobozi w’Ishyirahamwe ry’Umukino wa Chess ku Isi, Arkady Dvorkovich, rwamaze gusubikwa .

Uru ruzinduko kuba rwasubitswe nta sano nta rimwe bifitanye n’itabwa muri yombi ry’uyu muyobozi , kuko Arkady Dvorkovich ashobora kuba adatuje kuko akomoka mu gihugu cy’Uburusia kirimo guhangana na Ukraine.