Nibura abantu basaga 22 biravugwa ko bahitanywe n’impanuka y’ikimashini cyubaka muri Thailand kizwi nka Cranes cyagwiriye gariyamoshi yarimo igenda mu nzira yayo.
Amakuru atangwa n’inzego z’ubuyobozi muri Thailand avuga ko yari itwaye abantu bagera kw’195 ikaba yavaga mu mujyi wa Bangkok yerekeza mu ntara iherereye mu majyaruguru ashyira uburasirazuba bwa Thailand. biravugwa ko abantu basaga 80 bakomerekeye muri iryo sanganya- harimo umwe ufite umwaka w’amavuko.
Umwe warokotse iyo mpanuka akaba asanzwe abarizwa mu bakozi biyo gariyamoshi yasobanuye uko abagenzi bajugunywaga hanze nyuma yaho icyo cyuma cy’ubwubatsi cyari kiguye kuri iyo gariyamoshi.
Guverineri wa kampani ya leta igendanye no gutwara abantu muri Gariyamoshi akaba yamaze guhamagazwa kugirango hatangire iperereza ku cyateye iyo mpanuka.
Impanuka zikomeye zikomoka ku bwubatsi si ikintu kimenyerewe muri Thailand; ariko bimwe mu bice birangwamo kutita ku bakozi n’ibikoresho bitajyanye n’igihe ni kimwe mu biteza impanuka zihambaye muri icyo gihugu.
