Bamwe mu bayobozi b’ibigo by’imiryango yigenga yiyemeje gufasha abana bafite ubumuga bwo mu mutwe batangaza ko birengagijwe muri gahunda yo gukurikirana amasomo anyuzwa kuri radiyo na televiziyo n’imbuga nkoranyambaga mu gihe amasomo yasubitswe kubera icyorezo cya COVID-19.
Ikinyamakuru MamaUrwagasabo cyaganiriye na Ntibanyendera Elisam Salim uyobora impuzamiryango TUBAKUNDE, yita ku bana bafite ubumuga bwo mu mutwe, atangaza ko gahunda yo gukurikirana amasomo kuri radiyo na televiziyo yari nziza ku bana kugira ngo bakomeze gukurikira amasomo yabo batagiye mu bibarangaza n’ibishuko.
Gusa ngo iyo bigeze ku bana bafite ubumuga bwo mu mutwe bisa naho batatekerejweho kuko badashobora gukurikira amasomo mu buryo busanzwe.
Ati “Muri iyi gahunda yo kwiga ku maradiyo na televiziyo bo nta gahunda yabateguriwe, kuko bo biga mu buryo bwihariye, bakoresheje ibishushanyo mu buryo bita pikitogaramu [Pictograms].
Ni ukuvuga ngo mu by’ukuri mu burezi bwabo basa n’abataratekerejweho ugasanga ni ikibazo gikomereye bon ka ba nyir’ubwite ariko n’imiryango babarizwamo ku buryo uburezi bwabo ni ikibazo kugeza uyu munsi.”
Uyu muyobozi akomeza avuga ko ikigo k’igihugu cy’Uburezi REB mbere yo gutegura gahunda yo kwigisha muri ubwi buryo bari bakwiye kubanza gutekereza ibyiciro byose by’abana biga.
Ati “ bakagombye kuba barahamagaye abakora muri ubwo burezi bw’abafite ubumuga bwo mu mutwe nibura bakabagira inama z’iicyakorwa, kuko ubu ubona mu by’ukuri abana barasubiye inyuma ku buryo nidufungura amasomo tuzasa n’abatangiriye hasi kuri zeru kandi bitakagombye kuko gahunda yabo kuri televiziyo iranashoboka ku bazifite. Ni ukuvuga ngo mu barium bose bateguye nta mwalimu urimo wo mu bigisha afite ubumuga bwo mu mutwe.”
Umuyobozi ushinzwe ishami ry’iterambere ry’imibereho myiza y’abaturage mu karere ka Kicukiro, Karungi Rebecca, nawe yemeza ko abafite ubumuga nta mwihariko bahawe kandi wenda abafatanyabikorwa mu burezi bw’abo bana bashobora kuba bafite uburyo bashobora gufasha mu kubona ibyo bikoresho.
Ati “Ubwo buvugizi burakenewe; usanga uburezi bariya bana abkeneye ari uburezi buhenze, bunasaba ko haba hari n’abarimu bahuguwe noneho bikaba byajya muri gahunda ku buryo igihe twagiye ikibazo nk’ikingiki icyo kiciro nacyo kitakibagirana.”
Umuyobozi w’ikigo kita ku bana bafite ubumuga cya HVP/Gatagara Gikondo, Nteziryayo jean Pierre, avuga ko hari ibyakozwe mu kwigisha abo bana kandi bigikomeje.
Ati “Twateguye amasomo atandukanye ku bana bafite ubumuga bwihariye bwo mu mutwe cyakora kuyashyira kuri za televiziyo ngo abana batangire kuyakurikirana byari bikinozwa ariko hari amasomo yatanzwe make kuri abo bana kugira ngo turebe ko nabo bayakurikirana.
Kuyakurikirana kwabo biragoye; wibuke ko ari abana rimwe na rimwe batumva mu buryo bworoshye cyangwa ngo bavuge mu buryo bworoshye. Kumushyira imbere ya televiziyo rero ngo araza gukurikira amasomo byasabaga ko tubanza gusobanurira ababyeyi uburyo bazabikora. Ntabwo ari umwana waha amasomo, ikiganiro ngo abikurikire mu buryo ngo azakuwire icyo yavanyemo, ni umwana usabwa kuba ari kumwe nundi muntu akamusubirishamo inshuro zitandukanye.”
Uyu muyobozi yemeza ko muri gahunda ya vuba abana bamwe bazatangira gukurikirana ayo masomo kuri televiziyo ku ubufatanye n’umuryango Handicap International.
MUTUNGIREHE SAMUEL
