Abantu 13 bapfuye, abandi barakomereka, nyuma y’uko inkongi y’umuriro ikaze yibasiye agace gatuwemo cyane ka Tai Po kuri uyu wa Gatatu.
Inzego zishinzwe ubutabazi zatangaje ko abarenga 700 bashinzwe kuzimya umuriro bari bahanganye n’iyi nkongi, mu gihe abaturage barenga 700 bakuwe mu byabo nyuma y’uko umuriro wari umaze gufata ibice bitandukanye by’inyubako ndende zigizwe n’amazu yo guturamo.
Umuriro watangiriye mu nyubako zari ziri gusanwa, bikekwa ko bimwe mu bikoresho birimo n’imyenda yifashishwaga mu gupfundikira imwe mu myobo byongereye ubukana bw’iyi nkongi.
Inzego z’ubutabazi zakomeje ibikorwa byo gushakisha abakomeretse n’abandi bashobora kuba bagwiriwe n’inyubako ubwo zakongokaga.
Ubuyobozi bwa Hong Kong bwatangaje ko iperereza ryihuse ryatangiye kugira ngo hamenyekane icyihishe inyuma y’iyi mpanuka yateje umubabaro no gucika kw’igikuba mu baturage.
Abayobozi b’uyu mujyi bihanganishije imiryango yabuze ababo kandi basezeranya gushyira imbaraga mu kubonera abaturage ubufasha bw’ibanze n’aho kuba mu gihe ibikorwa byo guhangana n’ingaruka z’iyo nkongi bigikomeje.
