Yanditswe Umugiraneza Alice
Ishuri ryigisha abanyamategeko ILPD ryibutse Abatutsi bishwe muri Jenocide yakorewe Abatutsi mu 1994 ubwo bari bahungiye mu cyahoze ari urukiko rw’ubujurire (cour d’appel), babeshywa ko bahabwa ubutabera ariko ntibabubone.
Banenze umugambi mubisha wateguwe na Leta yariho urwego rw’ubutabera rukawufasha gushyirwa mu bikorwa.
Dr. Sezirahiga Yves, Umuyobozi wa ILPD w’umusigire, yihanganishije imiryango ifite ababo baruhukiye mu Rwibitso rw’akarere ka Musanze, abizeza ubufatanye abibutsa ko ibyabaye bitazongera.
Yagize ati: "Impungenge twamara abacitse ku icumu rya Jenocide ni uko ibyabaye bitazongera; hejuru y’amategeko twigisha nubwo bumuntu, kubana neza n’abantu, tukagira n’Imana ko Leta ifite iyo ntumbero yo kubanisha abantu. Nkuko twabisobanuriwe abiciwe hano nuko byari byateguwe na Leta mbi yariho icyo gihe."
Umuryango uharanira inyungu z’abarokotse Jenoside Ibuka wasabye ILPD nk’ishuri ryigisha amategeko kwigisha ayo mateka, bakanenga abiciye inzirakarengane mu nzu y’ubutabera kandi aribo bakagobye kubaha ubutabera.
Rusisiro Fesitus, umuyobozi wa ibuka yagize ati: "Hano hahoze ari inzu y’ubutabera, noneho baza gufata abantu bababwira ko bagiye kubarindira umutekano ariko hari mu rwego rwo kugira ngo bazabicire rimwe ."
ILPD ni ishuri ryigisha amategeko no kuyateza imbere, riherere i Nyanza mu ntara y’Amajyepfo.
Ryatanze inkunga ya 500,000fws rinizeza akarere ka Musanze na Ibuka ubufatanye kugira ngo ibyo batekereza gukora bazabigereho.
Urwibitso rw’akarere ka Musanze ruruhukiyemo imibiri isaga 800 y’abazize Jenocide yakorewe abatutsi mu 1994.
