Yanditswe na Habimana Chadadi
Abatuye mu murenge wa Kibungo mu karere ka Ngoma bavuga ko ibura ry’udukingirizo ari ryo zingiro ry’ubwiyongere bw’ubwandu bw’agakoko gatera Sida.
Uwitwa ko ahagarariye abakora uburaya muri ako karere witwa Uwabyeyi uzwi nka ’Kaka’ yabwiye itangazamukuru rya mamauRwagasabo ko hari igihe umuntu ukora uburaya akorera aho (atikingiye) kuko yabuze udukingirizo
Ati: "Ubuke bw’udukingirizo nibwo butera gukorera aho, akenshi usanga ku gasima tuba dufite ipaki imwe gusa".
Yakomeje avuga ko gukora uburaya we yitwa Uburangamirwa biterwa n’amikoro make.
Ati: "Twese twisanga mu buraya kubera amikoro make; turamutse tubonye igishoro twabuvamo".
Mu bukangurambaga buri gukorwa n’ikigo cy’igihugu gishinzwe ubuzima RBC, kivuga ko kiri kwibanda ku bakora uburaya kuko bari mu bibasirwa cyane.
Umukozi muri RBC mu gashami ko kurwanya Sida, Uwinkindi Ernest yatangarije abanyamakuru ko ibyo bakora ari imwe mu nzira ikomeye yanduriramo virusi itera sida.
Ati: "Abakora uburaya bandura Sida ku rwego rwo hejuru, niyo mpamvu turi muri ubu bukangurambaga kandi ntituzahagarara kubukora kugira ngo Sida igabanuke ndetse inacike".
Mu mibare itangazwa na RBC yerekana ko mu ntara y’Iburasirazuba ndetse n’Umujyi wa Kigali ariho kuri ubu hakigaragara ubwandu bushya ugereranije n’ahandi mu gihugu ari nayo mpamvu ariho hibandwaho muri ubu bukangurambaga.
Kuri ubu RBC iratanga udukingirizo ndetse inagira abantu inama zikurikizwa kugira ngo umuntu uwo ariwe wese atandura icyorezo cya Sida harimo kwifata, kwisiramuza, kudatizanya ibikoresho bikomeretsa n’ibindi.
