Urwego rw’igihugu rw’Ubugenzacyaha RIB rwatangaje ko rwamaze guta muri yombi Idamange Iryamugwiza Yvonne akurikiranwaho guteza imvururu n’imidugararo muri rubanda.
Uyu Idamange yari umaze iminsi agaragara ku mbuga nkoranyambaga avuga amagambo benshi bamaganiraga kure, yimvikanamo gusebya no kunenga ubufasha yahawe n’Ikigega FARG gifasha abanyeshuri batishoboye barokotse Jenoside yakorewe Abatutsi mu 1994.
Ni umugore w’umunyarwandakazi ndetse abavandimwe be bamwe bari bamaze iminsi nabo batangaje ko bitandukanyije nawe mu byo avuga.
Umuvugizi wa RIB, Dr. Murangira Thierry yabwiye Radio y’Igihugu ko afungiye i Remera mu gihe agikusanywa ibimenyetso by’icyo azakurikiranwaho.
Ntiyasobanuye uburyo yakozemo ibyaha bituma akurikiranwa ndetse nta makuru menshi yatangaje kuri iryo tabwa muri yombi rye ku mpamvu z’iperereza.
