Ikipe ya Rayon Sports ntiratsindwa umukino ufungura shampiyona mu myaka 12 ishize igiye kwakirwa na Kiyovu Sports.
Tariki ya 22 Nzeri muri 2012 nibwo ikipe ya Rayon Sports yatsinzwe n’Amagaju ibitego 2-1, mu mukino ufungura shampiyona y’umwaka wa 2012-2013.
Imyaka 12 irashize iyi kipe idatakaza umukino ufungura, haribazwa niba Kiyovu iraza gukoraho aka gahigo.
Kuri uyu wa Gatandatu tariki ya 13 Nzeri, kuri stade ya Kigali Pele nibwo ikipe ya Kiyovu Sports iraza kwakira Rayon Sports mu mukino ufungura shampiyona y’uyu mwaka kuri aya makipe, kuko hari indi mikino iraba mbere. Ikipe yafunguye imikino y’uyu mwaka w’imikino ni Gorilla yatsinze AS Muhanga ibitego 2-0.
Ikipe ya Kiyovu iraza kwakira uyu mukino yanashyize hanze amatike agomba kwifashishwa, ahasanzwe ni ibihumbi 5, ahisumbuyeho ni ibihumbi 10, VIP ni ibihumbi 20, VVIP ni ibihumbi 50.
Valens Nzabonimana.
