Sosiyete y’u Rwanda ikora Ubwikorezi bwo mu Ndege (RwandAir) yatangaje ko ibaye ihagaritse gutwara abagenzi bajya Dubai baturuka muri Kenya, Tanzania, Ethiopia na Nigeria kubera ingamba zo guhangana na Covid-19.
Ni nyuma y’uko Leta Zunze Ubumwe z’Abarabu zikumiriye abagenzi baturuka muri ibyo bihugu kubera ingamba zo guhangana n’ubwoko bushya bwa Covid-19 buzwi nka Omicron. Ni umwanzuro uzatangira kubahirizwa guhera kuri uyu wa Gatandatu tariki 25 Ukuboza 2021.
Itangazo rya RwandAir rigira riti “Ku bw’iyo mpamvu, RwandAir ntabwo izemera gutwara abagenzi bavuye muri ibyo bihugu bagana i Dubai guhera tariki 25 Ukuboza 2021 kugeza hatanzwe andi mabwiriza.”
RwandAir yasabye abagenzi bagizweho ingaruka guhitamo kongera guhindura urugendo bakagenda ikindi gihe cyangwa se bagasaba gusubizwa amafaranga yabo.
