Perezida mushya wa Afurika y’Epfo, Cyril Ramaphosa yamaze gushyira hanze abazab
a bagize guverinoma nshya, nyuma y’iminsi mike arahiye.
Uyu muperezida yagaragaje intambwe iganje yo kubahiriza ihame ry’uburinganire akora ibyo abamubanjirije batigeze bakora. Iyi guverinoma nshya yavuye ku baminisiteri 36 abagira 28.
Perezida Ramaphosa yavuze ko impamvu yo kugabanya umubare w’abaminisitiri no kunganisha umubare w’abagore n’abagabo ari ukugira ngo yubahirize ihame ry’uburinganire, ubufatanye n’ubwuzuzanye, guhuza ibikorwa n’ingufu.
Perezida Ramaphosa yavuze ko abagize iyi guverinoma yabatoranije abanje gushishoza kuko yifuza abantu bafite imbaraga mu kumufasha gukosora ibibazo bikomeye byabaye mu bukungu bw’afurika y’epfo kandi ngo abizeyeho ubunararibonye mu gukoresha neza umutungo w’igihugu.
Mu byo perezida Ramaphosa ashyize imbere mu bigomba gukosorwa mu gihugu cye harimo kugabanya umubare w’abadafite imirimo, ubusumbane mu mibereho y’abaturage, gukuraho amacakubiri ashingiye ku moko n’ubwicanyi byagiye bigaragara muri Afurika y’epfo mu myaka itandukanye.
Olive MUKAHIRWA
