Yanditswe na Mutungirehe Samuel
Abakora ubucuruzi bwambukiranya imipaka n’abanyenganda bo ku mugabane w’Afurika bashyiriweho uburyo bw’ikoranabuhanga bwo kwishyurana hagati yabo batarinze kujya kuvunjisha amafaranga y’imbere mu bihugu byabo ngo bishyure mu mafaranga mpuzamahanga, cyane nk’amadolari, "Pan-African Payments and Settlement System - PAPSS".
Ni uburyo bwafunguriwe Accra muri Ghana ku wa Kane tariki ya 13 Mutarama 2022.
Hashize igihe ibihugu byo mu Burengerazuba bw’Afurika, bigerageza uburyo bwo kwishyurana gutyo, "West African Monetary Zone (WAMZ) "West African Monetary Zone (WAMZ)" mu bihugu bitandatu, ari byo Gambia, Ghana, Guinea, Liberia, Nigeria na Sierra Leone. Iryo gerageza ryakozwe nka bumwe mu buryo bwo guteza imbere isoko rusange ryo ku mugabane w’Afurika AfCFTA, ryemerejwe mu Rwanda.
Ikiza cy’ubu buryo ni uko umucuruzi cyangwa abaranguzi baguze ibicuruzwa mu gihugu kitari icyabo ariko cyo ku mugabane w’Afurika, uguze ikintu azajya acyishyura mu mafaranga yo mu gihugu cye hanyuma uyakira nawe ayabone mu mafaranga yo my gihugu cye, hatajemo kuvunjisha, nkuko Prudence Sebahizi, Umujyanama Mukuru mu isoko rusange AfCFTA yabitangarije The New Times.
