Mutungirehe Samuel
Umuryango Uharanira Inyungu z’Abarokotse Jenoside Yakorewe Abatutsi MU 1994, IBUKA-Rwanda ufatanyije n’imiryango iwushamikiyeho yo muri diyasipora zitandukanye n’indi miryango yamaganiye kure ISHYIRAHAMWE “IGICUMBI-VOIX DES RESCAPES DU GENOCIDE”, riherutse gushingwa rivuga ko rije guhagararira uburenganzira bw’abacitse ku icumu rya Jenoside yakorerwe Abatutsi.
Tariki ya 27/5/021 havutse ishyirahamwe Igicumbi-Voix des rescapés du génocide contre les Tutsi, rishinzwe n’abayobowe na Basabose Philippe, rimurikwa tariki ya 01/8/2021.
Umuryango IBUKA Rwanda umaze kubona iryo shingwa ry’Ishyirahamwe Igicumbi, ufatanyije n’indi miryango itandukanye irengera Abarokotse Jenoside Yakorewe Abatutsi yasohoye itangazazo rihamagarira Abarokotse Jenoside Yakorewe Abatutsi kurigendera kure.
Ibuka Rwanda yabasabye kwirinda ibikorwa bisenya by’abagize iryo shyirahamwe ku mpamvu zitandukanye zirimo n’uko abarigize bahakana Jenoside yakorewe Abatutsi.
IBUKA Rwanda yagize iti "Bimwe mu biranga ihakana, ni ugukoresha uburyo bwose bushoboka bugoreka ukuri kuri Jenoside hagamijwe kuyobya rubanda, cyangwa se kwemeza ubeshya ko habaye jenoside ebyiri.
Iyi mvugo igaragarira mu nyandiko z’urudaca zandikwa n’abashinze iri shyirahamwe, nogushyigikira ikinyoma mu mvugo bakoresha ku mbuga nkoranyambaga n’ahandi.
Ukuri kuri jenoside yakorewe Abatutsi, ni uko yateguwe na Leta ya Habyarimana, ishyirwa mu bikorwa na Leta yiyise iy’Abatabazi. Jenoside yakorewe Abatutsi yahagaritswe n’Inkotanyi mu rugamba rukomeye rwo gutsinda abicanyi, no kurokora Abatutsi bicwaga.
Uku kuri, iri tsinda riyobowe na Basabose rirakuzi kuko abarigize hafi ya bose bakesha kurokoka ubutwari bw’inkotanyi zemeye guhara ubuzima bwazo kugira ngo bo n’abo mu miryango yabo barokoke. Iki kinyoma cyabo kigaragara nko mu nyandiko zashyizweho umukono na Basabose Philippe, Bayingana Jovin, Niyibizi Hosea, Rugambage Louis, Muhayimana Jason, na Gasirabo Dada tariki ya 7/8/2019, n’iya 6/6/2019."
Indi ngingo IBUKA Rwanda n’indi miryango byashingiyeho byamagana iri Shyirahamwe rya Basabose Philippe na bagenzi be ni "GUSHINGA ISHYIRAHAMWE MU NYUNGU ZA POLITIKI".
IBUKA Rwanda ivuga ko hari impamvu nyinshi zituma umuntu ashidikanya ku ntego z’iri shyirahamwe, ariko mu magambo yavuzwe barimurika byagaragaye ko ikigamijwe ari amacabiranya agamije kurengera inyungu za politiki nk’uko bikunze kugaragara muri amwe mu mashyirahamwe y’Abanyarwanda akorera muri diaspora ku migabane y’iburayi n’amerika. Abenshi bakunzegukoresha amayeri yo kuyaha inyito nziza, nyamara bagamije gusenya.
Indi mpamvu ni "IMVUGO ISENYA UBUMWE N’UBWIYUNGE BW’ABANYARWANDA" zigaragara.
IBUKA Rwanda yavuze ko u Rwanda ni igihugu kigendera ku mahame y’ubumwe n’ubwiyunge. Biratangaje kumva bamwe mu bashinze iri shyirahamwe bavuga ko batumva uko abacitse ku icumu bashobora « guturana n’ababahekuye »cyangwa se ngo ukuntu abakoze Jenoside barangije ibihano byabo
bahabwa umwanya mu mihango yo kwibuka. Nyamara hari amakuru menshi yatanzwe n’abanyururu, yatumye imibiri iboneka, ndetse n’ukuri ku bwicanyi bwakorewe Abatutsi kuramenyekana.
IBUKA Rwanda igashimangira ko bene iyo myumvire uretse gusenya nta kindi cyiza yazanira Abanyarwanda.
Ingingo ya nyuma yagendeweho ni uko basanzwe ari ISHYIRAHAMWE RYAMBURA UWACITSE KU ICUMU UBURENGANZIRA NK’UMUNYARWANDA WESE.
IBUKA Rwanda n’indi miryango iyishamikiyeho ivuga ko uwacitse ku icumu, kimwe n’undi Munyarwanda wese afite inshingano n’uburenganzira agenerwa n’amategeko. Abantu bose barareshya imbere y’amategeko, kandi itegeko rireba bose,
ntirishyirirwaho umuntu cyangwa se igice cy’abantu runaka.
