Mu mirwano imaze iminsi yaruburuye muri Teritwari ya Lubero, kuri iki Cyumweru abarwanyi ba M23 bafashe agace ka Kamandi-Gite kari mu Burengerazuba bw’ikiyaga cya Edouard kuri muri Sheferiy a Butangi.
Abumvise iturukacry’amasasu n’ibibumba biremereye, bavuze ko kare kare kuri iki Cyumweru aribwo abarwanyi ba M23 batangiye imirwano bagamije gufata vuba byihuse kiriya gice.
Bagabye ibyo bitero baturutse ahitwa Kirumba mu bilometero 20 ngo ugere i Kamandi-Gite.
Abo barwanyi bari bitwaje intwaro ziremereye zabafashije kumenesha aba Wazalendo bafatanyije n’ingabo za Repubulika ya Demukarasi ya Congo.
Radio Okapi yanditse ko gufata kariya gace bizaha abarwanyi ba M23 uburyo bwo kugenzura ibice byose bituriye Teritwari ya Lubero kugeza ku kiyaga cya Edoaurd gihuza aka gace na Teritwari ya Rutshuru.
Uburemere bw’imirwano bwatumye abatuye iki gice bakuramo akabo karenge barahunga.
Nyuma yo kubona ko basumbirijwe, abo muri Wazalendo bayabangiye ingata bahungira mu misozi ya Kamandi-Gite aho bikekwa ko bari kwisuganyiriza ngo bagaruke birukane M23.
Ibi biri mu byatumye ubwoba bw’abaturage burushaho kwiyongera.
M23 kandi iherutse no gutera igice cya Kirumba n’aho ikaba yarahirukanye abo muri Wazalendo.
source: rfi
