Madamu Jeannette Kagame ari kumwe n’abandi bagore b’abakuru b’ibihugu bya Afurika, yitabiriye inama ku kurwanya Virusi itera Sida yari ifite insanganyamatsiko igira iti “dushyire hamwe duharanira ahazaza hazira Sida”.
Iyi nama yabereye i Beijing mu Bushinwa mu gihe habaga n’inama y’Ihuriro ku bufatanye bwa Afurika n’u Bushinwa, ‘FOCAC’.
Yarebeye hamwe intambwe imaze guterwa ndetse n’imbogamizi zigihari mu kugera ku ntego yo kuba nta bwandu bushya bw’iki cyorezo bugaragara.
Umugore wa Perezida wa Burkina Faso, Sika Bella Kabore, wavuze mu izina ry’abandi bagore b’abakuru b’ibihugu bya Afurika bari bitabiriye iyi nama ku kurwanya Virusi itera Sida, yagaragaje ko Afurika ikiri umugabane ufite ubwandu bwinshi bw’iki cyorezo aho cyiyongera cyane muri Afurika yo hagati n’iy’Uburengerazuba.
Yasabye bagenzi be kongera imbaraga mu buvugizi baharanira ko hakorwa ubukangurambaga bukenewe bushyigikira intambwe imaze guterwa.
Madamu Sika Bella Kabore yanagarutse ku muhate w’Abagore b’Abakuru b’Ibihugu bya Afurika bahuriye mu ihuriro ryitwa OAFLA mu kurwanya Virusi Itera Sida hamwe n’indwara ya Sida bitarenze mu 2030.
Ashingiye kuri ibi, yasabye ko hakongerwa umusanzu mu gutuma abaturage bagerwaho n’ubuvuzi rusange, ibigo byihariye mu kurwanya Sida no kwirinda Cancer, ashimangira ko ibi byashyirwa mu ngingo z’ingenzi zitabwaho na FOCAC.
Margaret Kenyatta wavuze ahagarariye Afurika y’Uburasirazuba, yasabye abafatanyabikorwa bose umusanzu mu kongera imbaraga muri gahunda y’ubuvuzi kuri bose, ashimangira ko no gukomeza guhanahana ubumenyi ari kimwe mu bikenewe cyane.
Yashimye gahunda za OAFLA zirimo nk’igikorwa cy’ubukangurambaga cyiswe ‘Free to Shine Campaign’ kigamije kurandura ubwandu bushya mu bana n’ababyeyi.
Umuyobozi w’Ishami ry’Umuryango w’Abibumbye rishinzwe ubuzima, OMS, Tedros Adhanom Ghebreyesus, yashimangiye ko ubushake bwa politiki bukenewe mu gusakaza ubuvuzi kuri bose no kugira ngo serivisi z’ingenzi zigerweho.
Ati “Mu bufasha bwa nyabwo n’ishoramari, twahindura amateka. Twese twagira indoto zacu impamo.”
Abagore b’abakuru b’ibihugu bya Afurika barenga 30 nibo bari bitabiriye iyi nama. Baturuka mu bice bitandukanye bya Afurika nk’Amajyaruguru, Amajyepfo, u Burasirazuba n’u Burengerazuba.
Nyuma y’iyi nama, umugore wa Perezida w’u Bushinwa, Peng Liyuan, yatumiye abagore bose b’abakuru b’ibihugu mu birori byaranzwe no kwerekwa ibiranga umuco w’Abashinwa, bibera mu nyubako yitwa Diaoyutai.
Ku mugoroba wo kuri uyu wa Kabiri, Madamu Jeannette Kagame, yanakiriwe na mugenzi we Peng Liyuan, amutembereza mu nyubako yerekanirwamo ibijyanye n’impano zitandukanye.
