Irushanwa ngarukamwaka ryo kwibuka Padiri Kayumba Emmanuel ku nshuro ya 10, ryasojwe ikipe ya UTB Volleyball Club mu bagabo no mu bagore zegukanye ibikombe mu mikino yaberaga i Huye muri GSOB kuri iki cyumweru.
Imikino yatangiye kuwa Gatandatu, yakinwaga mu byiciro 5 harimo abagore, abagabo basanzwe bakina shampiyona ya Volleyball ndetse n’abakiri bato biga mu mashuri y’isumbuye n’abakanyujijeho muri uyu mukino (Veterans).
Mu cyiciro cy’abari n’abategarugori ikipe nshyashya ya UTB niyo yatwaye igikombe itsinze RRA VC amaseti 3 kuri 1.
Mu bato ikipe ya Semineri Nto ya karubanda nyuma yo gutsinda ikipe ya Groupe Officielle de Butare mu mvura ,yahise igera ku mukino wa nyuma ihura na GS Christ –Roi nayo yari imaze gusezerera Ikipe ya St Joseph Kabgayi, nuko Semineri itarwa igikombe itsinze Christ -Roi ku iseti ya Kamara mpaka.
Mubakiri bato ikipe y’iseminari niyo yegukanye igikombe
Mu bagabo, ikipe ya UTB yatwaye igikombe itsinze Gisagara Amaseti 3-0 nyuma yuko ku munsi wari wabanje yari yayitsinze amaseti 3-1.
Nyirimana Fidele, umutoza mukuru wa UTB VC yavuze ko yatangiye umwuga wo gutoza abifashijwemo na Nyakwigendera Kayumba ,ibi bikaba ari ibintu bimushimisha.
Ati: ‘’Ni irushanwa ryiza ririmo abana bato, ariko njyewe biranshimisha cyane kuko icyambere ni ukwibuka Kayumba nk’umurezi cyane ko ariwe watumye njya mu mwuga wo gutoza.’’
Iyi mikino ngaruka mwaka ikaba akenshi iba yiganjemo abana, ibi bigafasha abatoza kureba impano ziri mu banyeshuri bato kugira ngo bakomeze babakurikirane.
