By Imfurayabo Pierre Romeo
Ndabarinze Kabera wo mu Murenge wa Mulinga watemewe inka 11 n’impunzi y’Umunye-Congo muri Werurwe, abaturage bamaze kumushumbusha izindi 12 zirimo ikamwa n’indi ihaka.
Aborozi bo mu Karere ka Rwamagana tariki ya 8 Mata bagiye mu Karere ka Nyabihu kugabira Ndabarinze inka zirindwi nyuma yo kumva inkuru mbi y’uko mu ijoro ryo ku wa 24 Werurwe 2019 inka ze 11 zatemwe. Abo mu Karere ka Nyabihu nabo bamaze kumushumbusha inka eshanu.
Iri tsinda ry’aborozi bo mu Karere ka Rwamagana ryagiye riyobowe na Bugabo Busisi AbdoulKarim.
Mu ijambo rye yagize ati “Twumvise inkuru mbi twishyira mu cyimbo cye twumva ko abana be babuze amata, dufata umwanzuro wo kumusura tukamushumbusha dushimangira umuco mwiza w’abanyarwanda […] uwatunze ntakabure inka n’amata ku ruhimbi.”
Yakomeje asaba Ndabarinze gukomera, akirinda gucika intege kuko afite umuryango.
Ndabarinze Kabera n’umugore we Uwimana Zipora bashumbushijwe bashimiye aborozi bo mu Karere ka Rwamagana ngo bakimara kubona uburyo inka zabo zari zatemwe, batiyumvishaga ko bazongera kubona amata yo guha abana.
Ndabarinze ati" Ndashimira igihugu cyanjye ndetse n’abaturage bakomeje kumba hafi ubu bupfura tuzabuhorane."
Uhagarariye aborozi bo mu Karere ka Nyabihu, Tegeri Gad, yashimiye aborozi bo mu Karere ka Rwamagana bagaragaje ubuvandimwe.
Ati “Intera iri hagati y’Akarere ka Rwamagana na Nyabihu, ni ndende cyane. Tubashimiye igikorwa cy’indashyikirwa mwakoze.”
Yakomeje avuga ko aborozi bo mu Karere ka Nyabihu nabo bashumbushije Ndabarinze inka eshanu kandi ko igikorwa kigikomeje.
Source: Igihe
