Perezida mushya wa Tanzania Samia Suluhu Hassan yatangaje ko agiye gushyiraho komisiyo yihariye igizwe n’impuguke mu by’ubuzima zizamufasha kugenzura ibijyanye n’icyorezo cya COVID-19 mu gihugu bigatuma guverinoma imenya igikwiye gukorwa.
Samia yavuze ko ibijyanye na COVID-19 bidashobora kwemerwa uko byiboneye cyangwa ngo bihakanwe gutyo gusa mu gihe impuguke mu by’ubuzima ntacyo zatangaje kivuye mu bushakashatsi.
Yongeyeho ko abanyatanzaniya badashobora kwitwara nkaho ari akarwa mu bijyanye na covid-19 ariko kandi ko badashobora no kumira bunguri ibintu byose bazaniwe, kandi ko badakwiye gukomeza gusoma mu bitangazamakuru ibintu byose bijyanye na covid-19 mu gihe ntacyo Tanzania ivuga kuri icyo cyorezo ngo hamenyekane umurongo nyawo.
Ikinyamakuru The Citizen dukesha iyi nkuru kibukije ko ibya COVID-19 muri Tanzania biheruka kuvugwa muri Gicurasi 2020 habarurwa abantu 509 banduye.
