Sosiyete ya BasiGo, icuruza imodoka zikoresha amashanyarazi muri Afurika yo munsi y’Ubutayu bwa Sahara, yahawe uburenganzira bwo gukorera bateri za CATL mu gice cy’Umugabane w’Afurika cyo Munsi y’Ubutayu bwa Sahara.
Byitezweho ko ubu bufatanye buzaha amahirwe abakozi bashinzwe ikoranabuhanga muri BasiGo, kugira ngo babashe gusana no gufata neza bateri za CATL ku mugabane wa Afurika, iyi sosiyete yemejwe na CATL nk’umufatanyabikorwa wa mbere wemewe wo gusana bateri muri ako karere.
Binyuze muri iyo mikoranire, BasiGo Kenya na BasiGo Rwanda zizaba zihagarariye serivisi za CATL muri ako karere.
Nk’ikigo gihawe uburenganzira, abakozi mu ishami rya serivisi ya BasiGo muri Kenya no mu Rwanda bazahabwa amahugurwa yihariye n’ibikoresho bitangwa na CATL kugira ngo babashe gutanga serivisi zo gusana bateri.
Jit Bhattacharya, Umuyobozi Mukuru wa BasiGo, avuga ko iyi ari intambwe ikomeye kuri BasiGo, ndetse ari ni ikimenyetso cy’uko ubushobozi bubatse muri Kenya no mu Rwanda bwizewe.
Yagize ati :“Bateri ni igice cy’ingenzi kurusha ibindi mu modoka zikoresha amashanyarazi, kandi CATL niyo iza imbere ku Isi mu bijyanye n’ikoranabuhanga rya bateri. Ubu bufatanye buzatuma dushobora gukomeza gukurikirana imikorere ya bateri za CATL muri Afurika, mu ma bisi yacu, no ku bandi bose batunze imodoka zikoresha amashanyarazi kuri uyu mugabane.”
Ahamya kandi ko ubushobozi bwa BasiGo mu gutanga serivisi nziza bwagize uruhare mu kwemerwa na CATL nk’umufatanyabikorwa mwiza.
Yagize ati: “Uburambe bwa BasiGo no kuba ikorera muri Afurika bituma iba umufatanyabikorwa ukomeye wa CATL".
Naho Saba Azizi, Umuyobozi ushinzwe serivisi no gufasha abakiriya baguze ibikoresho bya CATL ku mugabane w’u Burayi, mu bihugu by’Abarabu no muri Afurika avuga ko ubu bufatanye ari intambwe y’ingenzi mu kwagura urusobe rwa serivisi za CATL ku rwego rw’Isi no gushyigikira serivise zo gutwara abagenzi mu buryo burambye muri Afurika.
Yagize ati: “Ubu bufatanye buzatuma serivisi zo gusana bateri za CATL zibonekaimbere mu bihugu bya Kenya n’u Rwanda. Ibyo bizafasha cyane mu kongerera igihe imodoka ziri mu kazi no kugabanya igihe n’amafaranga byatwaraga mu gutumiza ibikoresho no gusimbuza ibirimo batiri ziba zangiritse”.
Avuga kandi ko ikigo cya BasiGo kizakoreshwa nk’ikusanyirizo ry’amabatiri acyuye igihe kandi bikoroshya igenamigambi rya CATL ku rwego rw’Isi wo kuzisana no kwongera ku zikoresha.
Iyi ntambwe yo kugirwa umufatanyabikorwa wa CATL, ibaye mu gihe isoko ry’imodoka zikoresha amashanyarazi riri kwaguka cyane muri Afurika, nko mu bijyanye no gutwara abagenzi ndetse n’ubucuruzi.
Mahirwe Eulade
