Umuyobozi Mukuru w’Ikigo k’igihugu gishinzwe guteza imbere uburezi mu Rwanda REB, Dr. Ndayambaje Irene n’abamwungirije babiri bahagaritswe by’agateganyo ku mirimo ku mpamvu zo kunanirwa gushyira abarimu mu myanyauko bikwiye.
Itangazo ry’Ibiro bya Minisitiri w’Intebe byashyize ahagaragara kuri uyu wa 2 Ugushyingo 2020, ryatangaje ko Abayobozi b’ikigo cy’igihugu cy’Uburezi (REB) bahagaritswe by’agateganyo ku mirimo yabo bitewe no kunanirwa gukurikirana no guhuza ishyirwa mu myanya ry’abarimu uko bikwiriye.
Abahagaritswe ari Dr. Ndayambaje Irenée, Umuyobozi Mukuru w’Ikigo Gishinzwe Guteza Imbere Uburezi mu Rwanda (REB), Madamu Tumusiime Angelique, Umuyobozi Mukuru Wungirije w’Ikigo Gishinzwe Guteza Imbere Uburezi mu Rwanda (REB) na Bwana Ngoga James, Umuyobozi w’Ishami rishinzwe Iterambere n’Imicungire y’Umwarimu mu Kigo Gishinzwe Guteza Imbere Uburezi mu Rwanda (REB)
Hashize iminsi ibiri REB itangaje ko muri rusange abarimu batsinze bari bategereje guhabwa imyanya bangana na 7800 barimo 3753 bo mu mashuri abanza na 4047 bo mu mashuri yisumbuye. Abashyizwe mu myanya bose ni 4657 barimo 3687 bo mu mashuri abanza na 970 bo mu mashuri yisumbuye.
Abatarashyizwe mu myanya bose ni 3143 muri bo 66 ni abo mu mashuri abanza n’abandi 3077 bo mu mashuri yisumbuye.
Urugendo rwo gushyira abarimu mu myanya mu turere dutandukanye tw’igihugu narwo rukaba rukomeje.
