MUTUNGIREHE SAMUEL
Umuryango w’ibihugu 12 birimo n’u Rwanda bigize Inama mpuzamahanga y’ibihugu by’akarere k’Amajyepfo n’Iburasirazuba mu Biyaga bigari bw’Afurika (International Conference on the Great Lakes Region, ICGLR) watangaje ko uri mu nzira nziza yo guhangana n’ihohoterwa rishingiye ku gitsina rikorerwa abagore n’abakobwa riri kwiyongera mu bihugu bigize ako karere hanozwa uburyo bwo gufash uwahohotewe kwisanga mu muryango.
Byatangajwe kuri uyu wa gatanu tariki ya 27 Ugushyingo 2020 i Kigali, nyuma yo gusoza amahugurwa y’iminsi itatu yagenewe abatoza mu byo guhangana n’ihohoterwa rishingiye ku gitsina, kugira ngo bajye gutoza abanyamwuga basanzwe bafasha uwahohotewe kubona ubuvuzi bw’ibanze no gukurikirana ingaruka z’ihohoterwa ku buzima.
Umuyobozi w’ishami rya ICGLR rishinzwe amahururwa (ICGLR-RTF), Mugaruka Victor , yabwiye abanyamakuru ko mu karere kose bamaze guhugura abatoza 346, bo mu byiciro bine bya Polisi, ubutabera, abaganga n’abafasha mu buvuzi bwo mu mutwe.
Umuyobozi w’ishami rya ICGLR rishinzwe amahururwa (ICGLR-RTF), Mugaruka Victor
Yagize ati “Abo batoza ubu nabo bagiye gutoza abanyamwuga mu byo kwita ku wahohotewe, kugira ngo bashobore guhangana neza n’ibibazo by’ihohoterwa. Twari dusanzwe twita cyane ku gukumira ihohoterwa, dukorana na polisi, inzego z’ubutabera n’abaafsha mu buvuzi bw’imitekerereze; ariko twaravuze ngo ntitugomba kugarukira ku gukumira gusa, reka turebe no ku bita kuri wa wundi wahohotewe kuko uwahohotewe akeneye ubuafsha bufite akamaro, busubiza ikibazo yagize.”
Akomeza agira ati “Urabona iyo umuntu amaze gukorerwa ihohoterwa ahabwa serivisi zijyanye n’ubufasha bw’ibanze zo kumwitaho, kumuvura ariko noneho yava muri izo serivisi ntagira ikindi kintu kimufasha gusubira mu muryango n’abaturanyi, Community, ngo noneho yisangemo neza nta kato n’ihungabana (Integration & response).”
Mugaruka yavuze ko icyiciro k’iciro kigiye gukurikirano cy’abanyamwuga nikimara guhabwa ubwo bumenyi bwose, tugiye kuraba ngo ni gute ICGLR izashobora gushyiraho uburyo busobanutse bugaragaza aho uwahohotewe ashobora gukura serivisi z’ubutabazi n’ubufasha ariko abashe no kwisanga neza muri sosiyete yari asanzwemo.
Kimwe n’izindi nzego zitandukanye, Umuryango ICGLR nawo wahamije ko basanze muri ibi bihe bya COVID-19 ibyaha by’ihohoterwa rishingiye ku gitsina ryariyongereye, aho abangavu benshi batewe inda, hari kuvuka abana bakomoka ku bavandimwe babyaranye n’ibindi.
Umwe mu bahuguwe, Ngendahayo Moise, yavuze ko amasomo mashya bahawe abereka ko hadafashwa uwahohotewe gusa, ahubwo n’abo asanze mu muryango nabo bakwiye kuganirizwa ntibamubere undi mutwaro agiye kwisangamo wo guhura n’akato, kwimwa umwanya mu bikorwa by’iterambere.
Ngendahayo Moise, umwe mu banyarwanda bamaze iminsi itatu bahugurwa
Ati “Ntabwo dufasha uwo muntu ku giti ke wenyine, kandi nk’uko bisanzwe umuntu wahohotewe ntabwo aba ari umuntu usanzwe utuye aha wenyine, ni ukuvuga ngo ajya muri muryango n’abaturanyi agasanga itsinda ry’abandi bantu basanzwe bakora imirimo yo kwiteza imbere, akabana nabo, agahabwa ubufasha bwo kwiteza imbere no kwifasha.”
Mugenzi we Kabatesi Lidia, usanzwe ari Umuyobozi Mukuru w’umuryango ushinzwe kurengera uburenganzira bw’abana n’abagore, Empower Rwanda, ukorera mu ntara y’Iburasirazuba mu karere ka Rwamagana, yavuze ko nk’abana b’abakobwa bakunze gukorerwa ihohoterwa rishingiye ku gitsina hari ibyo bakwiye kwihitira gukora mu gihe bibabayeho.
Kabatesi Lidia asaba abakobwa kudahishira uwabasambanyije
Ati “Icya mbere ni ugutanga amakuru igihe cyose yahohotewe, uhereye mu mudugudu kugeza ku karere kandi bakagana inzego leta yashyizeho nka Isange One Stop Center kugira ngo bahabwe ubuvuzi bw’ibanze butuma badasama cyangwa ngo bandore indwara zinyura mu mibonanompuzabitsina mu masaha 72.”
Yakomeje avuga ko nta mukobwa ukwiye kwanga kuvuga uwamuhohoteye, akwiye kwibuka ko ubuzima bw’ibanze ari ubwe, atari ubw’umubyeyi uri kumubuza gutanga amakuru kandi bifasha kugira ngo arengere na murumuna we bashobora kwangiza.
Byamukama Nathan, mu buryo b’ikoranabuhanga yasoje amahugurwa abanza gushimira abaterankunga nka GIZ n’abandi batanze ubufasha ngo amahugurwa akorwe, avuga ko bahawe ubumenyi bwo kuziba icyuho mu rugamba rwo gushaka igisubizo ku kibazo k’ihohoterwa rishingiye ku gitsina riri kwiyongera.
Ati “Nk’urugero nzi ko ikijyanye na Isange One Stop center mwagaragaje ko zikwiye gukoreshwa mu bihugu binyamuryango, nzi ko turi kubiganiraho n’inzego zibishinzwe binyuze mu kanama k’umuryango k’amahugurwa RTF, kandi twize byinshi muri iyo Isange uko bikorwa kandi no muri Uganda byaba byiza tukareba uko uwahohotewe yahabwa ubufasha mu cyumba kimwe.
Yakomeje avuga ko ubushobozi bwo gukora ibyo byose ku muryango nubwo butabonekera rimwe ariko hagomba gukoreshwa ubuhari bukagera ku ntego yihawe bityo n’umuterankunga akaba yaza asanga hari icyakozwe yunganira.
Abanyamahanga bitabiriye ayo mahugurwa bashimye cyane ikigo u Rwanda rwashyizeho cy Isange One Stop Center gitanga ubufasha mbumbe ku bahohotewe mu gihe ahandi hari aho bikorerwa mu bitaro ahasanzwe hivuriza abandi barwayi.
Itangazamakuru naryo riri mu kiciro ICGLR ivuga ko kigiye kwitabwaho nk’umufatanyabikorwa kugira ngo ibyaha byo gufata ku ngufu n’iby’ihohoterwa muri rusange bigabanuke binyuze mu kubimenyekanisha no kugeza ubukangurambaga kuri benshi bashoboka.
Abitabiriye amahugurwa barimo abanyarwanda n’abandi banyamahanga bo mu bihugu 12 by’Afurika y’Amajyepfo n’Iburasirazuba mu biyaga bigari/Fotos Samuel M
Aya ni amahugurwa uyu muryango ICGLR uvuga ko aje yunganira ubukangurambaga buherutse gutangizwa na Minisiteri y’Uburinganire n’iterambere ry’Umuryango (MIGEPROF), y’iminsi 16 bwatangijwe tariki ya 25 Ugushyingo bukazageza tariki ya 10 ukuboza 2020, bugamije kwamagana ibikorwa by’ihohoterwa rishingiye ku gitsina rikorerwa abagore n’abakobwa biri kugaragara ko riri kwiyongera hakurikijwe imibare y’abahohoterwa buri mwaka.
