By Imfurayabo Pierre
Polisi yahagaritse igitaramo cya Tuff Gang cyaberaga ahantu bari bateguye muri Kicukiro ariko kikanyura kuri YouTube, ndetse aba bahanzi bafatwa nk’abarenze ku mabwiriza yo kwirinda icyorezo cya Covid-19.
Abari aho umuziki waturukaga bari abahanzi, abacuranzi na bamwe mu bagiteguye. Igitaramo cyatangiwe na Green P waririmbye indirimbo ebyiri, yakirwa na Bull Dogg, na we akurikirwa na Fireman.
Buri muhanzi yaririmbaga indirimbo ebyiri, Fireman asoje ize agiye kwakira umuraperi ukurikiyeho, ahindukiye abona amazi si yayandi, araruca ararumira.
Abari bakurikiye iki gitaramo kuri konti ya YouTube ya MK1 TV babaye nk’abaguye mu kantu bibaza ibibaye, nyuma y’iminota itari mike n’abacuranzi bahagurutse mu byicaro byabo, Lucky Nzeyimana wari ukiyoboye yemeza ko gisubitswe.
Yagize ati ”Ndagirango ntangire nihanganisha abari badukurikiye kuri MK1 TV, hajemo ibibazo bitewe n’amabwiriza yo kwirinda Covid-19,"
Amakuru yemeza ko abari hano bose barimo Bull Dogg, Green P, Fireman, P Fla n’abacuranzi ba Symphony Band bahise bafatwa nk’abarenze ku mabwiriza yo kwirinda Covid-19, kimwe na bamwe mu bagize itsinda ryateguye iki gitaramo.
Bahise bajyanwa muri IPRC Kicukiro ahakunze kujyanwa abarenze ku mabwiriza yo kwirinda Coronavirus, bakigishwa nyuma bakarekurwa, byaba ngombwa bagacibwa amande.
Mu mabwiriza yo kwirinda Coronavirus, ibitaramo ntibyemewe kimwe n’ibindi bikorwa bihuza abantu benshi. Igihe umuntu agiye aho ahurira n’abandi asabwa kwambara agapfukamunwa n’amazuru kandi akazirikana gusiga intera hagati ye na mugenzi we.
