Yanditswe na NIMUGIRE Fidelia
Ku wa 13 Kamena nibwo impunzi z’Abanyekongo zigera ku 10,000, zahungiye mu Karere ka Kisoro nyuma yuko inyeshyamba za M23 zigaruriye umujyi uhana imbibi na Bunagana, zanga gusubira mu gihugu cyazo, zivuga ko nta mutekano zifite.
Ni impunzi zikomoka mu turere twa Rutshuru, Busanza, Jomba, Gisigari, Tongo, Bunagana, na Masisi, zose ziri mu majyaruguru ya Kivu.
Umwe mu mpunzi witwa Bwana Juma Kumwami, ku wa mbere yagize ati: “Sinshobora gusubira mu rugo nzi ko abasirikari ba guverinoma n’itsinda ry’ingabo ziturutse mu bihugu by’Afurika y’Iburasirazuba bazahita birukana inyeshyamba za M23 aho bafashe. Twishingikirije kuri M23 nk’imbaraga zikomeye ariko mu 2013, zaratsinzwe maze zidusiga mu kaga. ”
Umuvugizi w’inyeshyamba za M23, Maj Willy Ngoma, ntabwo yashoboye kuboneka kuko atitabye inshuro nyinshi cyangwa ngo asubize ubutumwa bugufi ikinyamakuru the Daily Monitor cyamuhamagaye.
Icyakora, mu cyumweru gishize yavuze ko impunzi zose z’Abanyekongo zemerewe gutaha kubera ko ako gace gafite umutekano.
Ku wa kabiri, Komiseri w’akarere ka Kisoro, Bwana Shafiq Sekandi, yatangaje ko nubwo mu minsi itatu ishize nta mirwano yabaye ku ruhande rwa Kongo ya Bunagana, izindi mpunzi zambukaga zisubira muri Uganda.
Bwana Sekandi yagize ati: "Bamwe mu mpunzi z’Abanyekongo bagaragaye basubira muri Uganda bavuze ko kuva inzego z’ubuyobozi zashyirwaho n’inyeshyamba za M23 mu gace kabo, gusoresha abaturage no gusahura imitungo yabo bimaze kuba akamenyero."
Umuyobozi wa LC3 mu Nama Njyanama y’Umujyi wa Bunagana, Bwana Ismail Ndayambaje, yavuze ko iki kibazo cyateje ibibazo by’imibereho nko kongera umubare w’ibyaha, yongeraho ko impunzi zimwe na zimwe zigira uruhare mu kumena amaduka no kwiba imyaka mu busitani.
Yavuze ko hashobora no kubaho indwara ziterwa n’umubyigano ndetse n’isuku nke.
Bwana Ndayambaje ati: “Ubuzima bwabo burahangayikishije, mpunzi zimwe zorohereza mu gihuru kiri hafi kubera ko tudafite imisarani rusange. Mugihe imvura itangiye kugwa, duhangayikishijwe n’indwara, cyane cyane kolera na dysentery. Impunzi zishobora kandi gukwirakwiza indwara nka Covid-19, Ebola na Monkey Pox.”
Bwana Ndayambaje yasabye guverinoma gutanga inkunga idasanzwe mu nama njyanama y’umujyi kugira ngo ibashe gukemura ibibazo by’impunzi.
