Nyuma yuko u Rwanda narwo ruhawe inkingo za Covid-19 muri gahunda y’Umuryango w’Abibumbye yiswe COVAX, kuri uyu wa kane ibitaro byose mu gihugu birimo kugezwaho izo nkingo, zimwe zatwawe mu modoka zabegenewe izindi zitwatwa muri kajugujugu za gisirikare kugira ngo zigezwe kure mu ntara mu buryo bwihuse.
Ku wa gatatu ejo hashize nibwo u Rwanda rwakiriye inkingo za mbere zanyujijwe muri Covax, igamije kugeza inkingo kuri bose. Ku ikubitiro u Rwanda ruhabwa inkingo 342.960 zirimo 102.960 za Pfizer n’izigera ku 240.000 za AstraZeneca.
Ku gicamunsi cyo kuri uyu wa Kane, kajugujugu za mbere zagejeje inkingo mu Karere ka Huye, izindi zizigeza mu ka Burera mu Ntara y’Amajyaruguru, izindi mu karere ka Rubavu mu Majyaruguru y’Uburengerazuba bw’u Rwanda.
Biteganyijwe ko abazakingirwa ku ikubitiro ari abantu bakuze guhera ku myaka 65 kuzamura, abafite ubumuga, abarwaye indwara zikomeye nka Diabete, iz’umutima ndetse n’iz’ubuhumekero. Abantu bazakingirwa muri iki cyiciro bangana na 171.480.
