Abajyanama b’ubuzima bakorera mu karere ka Kirehe bavuga ko bakusanyije amafaranga yo kubaka isoko rya kijyambere ariko ubu bakaba batazi iherezo ry’ayo mafaranga batanze.
Abajyanama b’ubuzima bakorera mu karere ka Kirehe, baganiye n’umunyamakuru wa Mama Urwagasabo TV, ni abakorera mu murenge wa Mushikiri.
Aba bajyanama b’ubuzima bavuga ko batswe amafaranga n’akarere ngo hubake isoko rigezweho muri aka karere ahazwi nka Nyakarambi, ariko ubu imyaka ibiri irashize batazi irengero ry’amafaranga batanze.
Umwe mu baganiriye natwe utuye mu murenge wa Mushikiri yagize ati ‘’twe abakorera aha muri Mushikiri twatanze agera kuri miriyoni cumi na zirindwi, kandi ubwo nitwe gusa, rero reba akarere kose, urumva ko ari amafaranga menshi’’.
Undi nawe ati ‘’ twatanze aya mafaranga twizezwa ko tuzubakirwa isoko gusa kugeza nubu turacyategereje, mbese ntawe utubwira ngo dore wenda imirimo yo kubaka igeze aha cyangwa ngo tuzatangira’’.
Umuyobozi w’akarere ka Kirehe Rangira Bruno, avuga ko bakiri gukusanya ubushobozi bwo kubaka, kuko amafaranga yose akenewe ataraboneka ugereranyije n’ingengo y’imari ihari.
Yagize ati"Amafaranga amaze kuboneka ni miriyoni Magana ane z’amafaranga y’u Rwanda mu gihe hagitegerejwe andi kugira ngo imirimo yo kubaka iri soko itangire. Kugeza ubu akarere ka Kirehe nta soko rya Kijyambere gafite mu mugi wa Nyakarambi irihari ubonako ritajyanye n’igihe.
Abajyana b’ubuzima bo mu karere ka Kirehe bose baswe amafaranga yo kubaka isoko rigezweho nk’abafatanyabikorwa, amakuru dufite n’uko abo mu murenge wa Mushikiri batanze arenga miliyoni 17.
Muri rusange muri uyu mujyi wa Nyakarambi ubona ko hakenewe isoko. Usibye akarere ka Kirehe, utundi turere usanga dufite isoko ryiza kandi rijyanye n’igihe.
