Sosiyete Nyarwanda ikora ubwikorezi bw’abantu n’ibintu mu kirere, RwandAir, yatangaje ko isubitse ingendo zijya n’izituruka ku Kibuga cy’indege Mpuzamahanga cya Entebbe muri Uganda guhera tariki ya 10 Kamena 2021.
Uwo mwanzuro wafashwe mu gihe muri icyo gohugu hakomeje kugaragara ubwiyongere budasanzwe bw’icyorezo cya COVID-19 nk’uko byatangaajwe mu itangazo ryaraye rishyizwe hanze na RwandAir.
Mu ntangiriro z’uku cyumweru nibwo Guverinoma ya Uganda yahumirije ifata umwanzuro so gusubika amashuri yose akorera ku butaka bwaho mu minsi 42 uhereye yarimo ya 7 Kamena, bitewe n’ubwandu bwinshi bwa Coronavirus, bisa nk’ikiciro cya Kabiri cya COVID-19 kigarutse.
Itangazo riya RwandAir ragira riti: ” Kubera ubwiyongere budasanzwe bwa COVID-19 muri Uganda, RwandAir itangaje ko ihagaritse ingendo zerekeza n’iziva muri Entebbe guhera tariki ya 10 Kamena 2021, kugeza igihe hazatangirwa ikindi cyemezo.”
RwandAir yakomeje igira iti: “Twiseguye byimazeyo ku ngaruka zose iki cyemezo cyaba kigize [by’umwihariko ku bakiriya].”
Abakiriya ba RwandAir bagizweho ingaruka basabwe kuba bakongera gusaba guhindurirwa igihe cy’urugendo ubwo zizaba zisubukuye, cyangwa bagasaba gusubizwa ikiguzi cya tike bishyuye.
Iki cyemezo gifashwe mu gihe Uganda imaze iminsi mike igaragaramo ubwiyongere budasanzwe bw’icyorezo cya COVID-19 cyatumye amashuri afungwa ndetse n’ibindi bikorwa bitandukanye birahagarikwa mu rwego rwo guharanira guhangana n’ubwo bwiyongere.
Ni mu gihe kandi abagenzi bava muri Uganda bangiwe no kuba bakwerekeza muri Leta Zunze Ubumwe z’Abarabu (UAE) guhera kuri uyu wa Gatanu tariki ya 11 Kamena 2021, bikaba byagize n’ingaruka ku bagenzi baturuka muri Repubulika Iharanira Demokarasi ya Congo (RDC) na Zambia.
Muri Uganda abamaze gutahurwaho icyo cyorezo bagera ku 56,949 barimo 47,760 bakize n’abamaze gupfa 402.
