Mu gihe hamaze iminsi hatangwa doze ya kabiri y’inkingo za COVID-19 zahawe abaturage mu kiciro cya mbere uko ari ebyiri, Minisiteri y’Ubuzima yatangaje ko kuri uyu wa Kabiri hatangira gukingirwa ikindi kiciro gishya gihabwa doze ya mbere y’urukingo rwa Phizer.
Iyi minisiteri yatangaje ko izindi nkingo 50,300 za Pfizer zagejejwe ku bigo nderabuzima n’ibitaro bya Leta hirya no hino mu Rwanda.
Gukingira COVID19 icyiciro gishya biratangira ku wa kabiri tariki ya 08.06.2021 hakingirwa abafite nibura imyaka 75. Abandi bazagenda bagerwaho hibandwa ku bakuze.
Mu gihe Abanyarwanda bakomeje guhabwa urukingo rwa COVID-19 mu byiciro binyuranye, Minisiteri y’Ubuzima ikomeje gusaba buri wese, yaba uwahawe urukingo n’utararuhabwa gukomeza kubahiriza amabwiriza yo kwirinda icyorezo ari yo kwambara agapfukamunwa neza, gukaraba intoki kenshi gashoboka, gushyira intera hagati y’umuntu n’undi no kwirinda kujya mu mahuriro atari ngombwa.
