Ishami ry’Umuryango w’Abibumbye rishinzwe iterambere (UNDP) ryashyikirije Leta y’u Rwanda robo (robots) eshatu zizifashishwa n’inzego z’ubuzima mu rugamba rwo guhangana n’icyorezo cya COVID-19.
Ni robo zashyikirijwe ibitaro bya Nyarugenge, kuri ubu byagizwe Ikigo k’Ikitegererezo mu kwita ku barembejwe na Coronavirusi, bakeneye ubufasha bwisumbuye.
Izo Robots ngo zizifashishwa mu gusukura ahantu hahurira abantu benshi nko ku bitaro, ku masoko, ku bibuga by’indege no ku mipaka, hagamijwe kurushaho guhangana n’ikwirakwira rya COVID-19.
Izi robots nshya zatanzwe ku bufatanye na ‘THOR UVC’ z uko ari 3 zifite agaciro k’amafaranga y’u Rwanda miliyoni 210, zikaba zije zisanga izindi 5 na zo zatanzwe muri Gicurasi 2020 na UNDP ku bufatanye na ‘ZORABOTS’, zifite agaciro ka miliyoni 180.
Ubuyobozi bwa UNDP bwagize buti: “Robo nshyashya z’Ikigo THOR UVC zizifashishwa mu gusukura ku bigo bivurirwamo abarwayi ba COVID-19, ku bitaro ndetse n’ahandi hantu hahurira abantu benshi nk’amasoko, ibiro cyangwa imipaka hagamijwe guhagarika ikwirakwira rya COVID-19.”
Izi robo zivugwaho kuba zifite ubushobozi buhambaye burimo n’ikoranabuhanga rizifasha kumenya aho zamaze gusukura no gutera umuti uhagije mu kwica udukoko twose turangwa ahahurira abantu benshi.
