By Imfurayabo Pierre
Ikigo cy’Igihugu gishinzwe ubumenyi bw’ikirere, Meteo Rwanda, cyatangaje ko muri Kamena 2020, imvura izagabanuka ku buryo bizagira ingaruka ku bwatsi bw’amatungo.
Meteo Rwanda yatangaje ko mu ukwezi kwa Kamena 2020 hateganyijwe imvura nke iri hagati ya milimetero 0 na 30 mu Rwanda hose. Mu turere twa Rubavu n’ igice cy’uturere twa Musanze, Rutsiro, Nyabihu, Burera, Nyamagabe, Nyaruguru, Rusizi na Nyamasheke hateganyijwe imvura iri hagati ya milimetero 20 na 30 muri Kanama.
Mu bice bisigaye bigize uturere tw’intara y’i Burengerazuba, iy’Amajyaruguru uretse uduce twa Rulindo na Gicumbi duhana imbibi na Kigali, ahasigaye muri Nyaruguru na Nyamagabe ndetse n’amajyaruguru y’akarere ka Muhanga hateganyijwe imvura iri hagati ya milimetero 10 na 20.
Meteo Rwanda yatangaje ko ahasigaye hose hateganyijwe imvura nke iri hagati ya milimetero 0 na 10. Iyi mvura iteganyijwe izaturuka ku miterere ya buri hantu mu gihugu.
Imvura iteganyijwe muri Kamena 2020 iri munsi gato y’impuzandengo y’imvura isanzwe igwa muri uko kwezi mu gihugu hose. Ikigereranyo cy’imvura isanzwe igwa muri Kamena iri hagati ya mm 0 na 50 bitewe n’ahantu.
Imvura yaguye muri Gicurasi yari iri mu kigereranyo cy’isanzwe igwa mu Ntara y’Amajyarugu, Amajyepfo ndetse n’Iburengerazuba naho mu ntara y’Iburasirazuba n’Umujyi wa Kigali ikaba yarabaye nke cyane. Ibi bikaba byaratumye imirimo yo gusarura no guhunika igenda neza naho ibihingwa byatewe nyuma bikaba byabura umusaruro ugaragara.
Muri Kamena, hateganyijwe imvura nke cyane bikazatuma imirimo yo guhunika igenda neza, amazi azatangira kugabanuka, ndetse n’ubwatsi bw’amatungo buzagabanuka.
