Yanditwse na NIMUGIRE Fidelia
Ubudage bwashinje kompanyi ya gaze (gas) y’Uburusiya Gazprom kuba intandaro y’izamuka ry’ibiciro bya gaze kubera kugabanya cyane ingano y’ibyo yoherezayo.
Gazprom yavuze ko irimo gutuma gaze yohereza mu Budage itagera kuri metero kibe (cube) miliyoni 70 ku munsi, ikigero kiri munsi cyane ya kimwe cya kabiri cy’iyo isanzwe ihohereza.
Iyi kompanyi yo yavuze ko impamvu yatanze ari uko ishaka gusana no gusukura ibikoresho byayo byo mu muyoboro unyuramo gaze wa Nord Stream.
Ariko Minisitiri w’ubukungu w’Ubudage Robert Habeck yavuze ko ari "icyemezo cya politiki" atari icyemezo kijyanye na tekinike.
Yagize ati: "Birumvikana ko ari amayeri yo kutubuza amahwemo no gutuma ibiciro bizamuka".
Mbere yaho ku wa kabiri, Gazprom yavuze ko igiye kugabanya gaze yo mu muyoboro wa Nord Stream 1 ikava kuri metero kibe miliyoni 167 ku munsi ikagera kuri metero kibe miliyoni 100.
Ariko ku wa gatatu, yavuze ko igiye kongera kuyigabanya ikagera kuri metero kibe miliyoni 67 ku munsi.
Ku wa gatatu Gazprom yanagabanyije gaze yohereza mu Butaliyani ho irenga 15%, nkuko kompanyi ya gaze y’Ubutaliyani ENI yabivuze.
Ubutaliyani, cyo kimwe n’Ubudage, bicungira cyane kuri gaze y’Uburusiya, yihariye 40% bya gaze Ubutaliyani butumiza mu mahanga.
Iki cyemezo cya kompanyi y’Uburusiya kije nyuma y’ibyumweru bibiri abayobozi bo mu muryango w’Ubumwe bw’Uburayi EU bemeranyijwe guhagarika gutumiza gaze mu Burusiya bitarenze mu mpera za 2022 mu rwego rwo guhana Uburusiya ku bitero yagabye muri Ukrain kuri 24 Gashyantare 2022.
Pologne (Poland), Bulgaria, Finland, Denmark n’Ubuholandi byamaze guhagarikirwa gaze karemano byohererezwaga n’Uburusiya, nyuma yuko byanze ubusabe bwuko "ibihugu bitari inshuti" z’Uburusiya biriha Gaze by’Uburusiya mu mafaranga yabwo azwi nk’ama-roubles.
Ubwo busabe bw’Uburusiya bwo kwishyura gaze mu ma-roubles bwafashwe nko kongera kugarura agaciro k’irifaranga, nyuma yuko rishegeshwe n’ibihano bwafatiwe n’ibihugu byo mu burengerazuba (Uburayi n’Amerika).
