Hari umuturage witwa Uwemeyinkiko Aloys utuye mu karere ka Huye, Umurenge wa Tumba uvuga ko afite ishyamba mu Murenge wa Kitabi mu karere ka Nyamagabe, arashinja ubuyobozi bwaho gutanga icyangombwa binyuranyije n’amategeko.
Ibi yabitangarije umunyamakuru wa mamaurwagasabo TV, ko yakorewe akarengane ko kuba baramuriganyije ishyamba rye riri mu mudugudu wa Wanyakanyeri, Akagari ka Mujuga umurenge wa Kitabi.
Yagize ati: "Nakorewe akarengane ku ishyamba ryanjye nari narateye, akarere gatanga ibyangombwa mu buryo bunyuranyije n’amategeko n’umuyobozi w’Umurenge iryo shyamba arigabanyamo kabiri kandi uwo twagombaga yari murumuna wanjye, ashyiramo undi muntu wa gatatu aryifotorezaho, hanyuma njya kumurega, umuyobozi w’Umurenge ndamutsinda hanyuma aramfunga."
Uyu muturage yakomeje agira ati: "Bamfunze iminsi itandatu nzira ishyamba ryanjye hanyuma umuyobozi yamfotoranye n’ibyuma avuga ko ndwanisha inyuma, ubu icyo nsaba nuko narenganurwa kuri ubwo buhemu nakorewe."
Umunyamabanga nshingwabikorwa w’Umurenge wa Kitabi Gasore Jean Claude yabwiye MAMAURWAGASABO TV ko ikibazo cya Aloys akizi, gishingiye ku makimbirane yo mu muryango.
Yagize ati: "Nibyo koko Aloys yangejejeho icyo kibazo, ariko iryo shyamba ntabwo ari irye, nirya mushiki we kandi hari ibyo twamusabye kubahiriza bitewe nuko umubyeyi wabo buri wese yamuhaye umunani we. Niba ari inzira itegenwa n’itegeko agomba kuyubahiriza, azaze tumufashe n’ubuyobozi bw’Akarere kuko biri mu nshingano zacu."
Uyu muturage yakomeje avuga ko iyo agiye mu buyobozi bamwita ko yataye umutwe akaba ariho ahera asaba ko yarenganurwa agasubizwa ishyamba rye.
Inkuru irambuye wayisanga muri iki kiganiro: HUYE: UMUTURAGE ARASHINJA GITIFU N’AKARERE KA NYAMAGABE KUMURENGANYA/ URUBANZA RWA GITIFU I HUYE https://www.youtube.com/watch?v=cy6PE3HD2CM
Yanditswe na Jean Claude Ndayambaje
