Rumwe mu rubyiruko rwo mu karere ka Rwamagana, rwo muri santere ya Muyumbu ahazwi nko ku Ivi, bakora uburaya barashinja abajyanama b’ubuzima kubagurisha udukingirizo baba barahawe ngo badutangire ubuntu ku bashaka gukora imibonano mpuzabitsina bikingiye.
Ni udukingirizo abajyanama b’ubuzima mu mudugudu bahabwa kugira ngo hatagira uwandura virusi ya Sida cyangwa izindi ndwara zandurira mu mibonanompuzabitsina idakingiye.
Ku bakobwa bakora uburaya muri ako gasantere ko ku Ivi, bavuga beruye ko uburaya ari bwo bubatunze kuko ntakandi kazi bagira.
Bakomeza bavuga ko bafite ikibazo cyuko virusi itera Sida yazakwirakwira muri benshi kubera ko udukingirizo bagakoresheje abajyanama b’ubuzima bajyaga batubaha ku buntu basigaye batubagurisha, bikarangira bakoreye aho (barikingiye).
Uyu ni umwe mu bitwa Indangamirwa (indaya) bafite icyo kibazo, waganiriye na TV1 dukesha iyi nkuru, yagize ati: "Udukingirizo abadufite, baduhaye ngo bajye baduha indangamirwa ku buntu baratugurisha wajya no kukamwaka akakubwira ngo urampa amafaranga, waba utayafite akakakwima ukagenda."
Undi mukobwa ugaragara nk’ukiri muto ariko ukora uburaya agira ati: "Dufite Abanyabuzima hano ku Ivi nta prudence (agakingiriro) baguha ahubwo wajya kuyigura kandi barazifatiye Ubuntu; niba ugiye ku munyabuzima akaguha prudence ya 100frw urumva aba akumariye iki?"
Uyu akomeza avuga ko nyuma yo kubona ko basigaye batazibaha mu buryo bworoshye basigaye bajya kwa muganga ku Muyumbu cyangwa i Murenge.
Ati: " Rero ibyiza mwababwira, nkatwe b’abakobwa niba ari prudence tugiye kureba tukazizana."
Aba bakobwa n’abandi babyaye kubera kwishora mu buraya muri aka gace bavuga ko mbere zitarajya mu maboko y’abajyanama b’ubuzima bajyaga bazisanga mu gasanduku ku mudugudu uzishaka akajya kuzifata ku buntu.
Ibyo kubura udukingirizo kw’uru rubyiruko rw’abakobwa bishimangirwa na basaza babo b’abahungu cyangwq abagabo, bavuga ko kwa muganga bazibaha ariko abajyana b’ubuzima bo bakazibagurisha.
Uyu yagize ati: "Ariko bariya banyabuzima bazigurisha ni ba bayobozi barya magana atanu kugira ngo bakemure ikibazo cy’umuntu."
Ikigo cy’Ubuzima RBC ntacyo kirasubiza umunyamakuru ngo amenye ikibazo cyaba kiri muri abo bajyanama b’ubuzima kigenzura cyangwa niba hari andi mabwiriza bafite mu itangwa ry’udukingirizo aho twagenewe gutangwa ku buntu mu gihugu.
Samuel Mutungirehe
