Yanditswe na Nimugire Fidelia
Abasirikare ba Eritrea batangije igitero kinini mu ntara ya Tigray yigumuye kuri Guverinoma ya Ethiopia.
Ni igitero cyatangajwe n’umuvugizi w’inyeshyamba z’ishyaka rya Tigray, wa TPLF.
Intumwa y’Amerika yavuze ko Amerika ibizi ko abasirikare ba Eritrea bambutse umupaka berekeza muri Tigray, ndetse yabyamaganye.
Nubwo bimeze bityo leta zombi ntacyo zirabivugaho. Gusa intambara iramutse hagati ya Eritrea na TPLF, byaba bikomeye cyane nyuma y’uko umutekano wari umaze amezi 5 wongeye kugabanuka.
Intambara yatangiye mu Gushyingo 2020, nyuma yo gushwana gukomeye hagati ya Minisitiri w’intebe wa Ethiopia, Abiy Ahmed n’umutwe wa Tigray People’s Liberation Front (TPLF), ugenzura ako karere.
Eritrea yinjiye muri iyo ntambara ku ruhande rw’igisirikare cya Ethiopia, ariko amakuru avuga ko mu mwaka ushize yacyuye benshi mu basirikare bayo.
Ku wa kabiri, umuvugizi wa TPLF Getachew Reda yavuze ko imirwano ikaze yari irimo kubera mu duce twinshi two ku mupaka wa Tigray na Eritrea.
Mu butumwa bwo kuri Twitter, yagize ati: “Eritrea irimo kohereza igisirikare cyayo cyose hamwe n’inkeragutabara. Abasirikare bacu barimo kurwana gitwari ku birindiro byabo.”
Yongeyeho ko abasirikare ba Ethiopia na bo barimo kurwana muri icyo gitero.
Mike Hammer, intumwa yihariye y’Amerika mu karere k’ihembe ry’Afurika, yavuze ko Amerika yakomeje kugenzura ingendo z’abasirikare ba Eritrea bambuka umupaka.
Yagize ati: "Barahangayikishije cyane kandi turabyamaganye. Kuba abasirikare ba Eritrea bari muri Ethiopia nta kindi bikora kitari ugutuma ibintu birushaho kugorana, no kwenyegeza umuriro mu bintu bisanzwe n’ubundi bibabaje cyane".
Muri iyi ntambara, abantu babarirwa mu bihumbi barishwe naho abandi babarirwa muri za miliyoni bata ingo zabo.
Kugera muri Tigray biragoye cyane kandi biranagoye kwemeza amakuru ku mirwano mu buryo bwigenga.
