Yanditswe na NIMUGIRE Fidelia
Abagize ibiserukuru bitatu by’umuryango wa Bob Marley baraza kuba bari mu gitaramo kuri uyu wa kabiri mu mujyi wa Birmingham mu Bwongereza, ni nyuma y’imyaka 50 ishize nyuma y’igitaramo cya mbere uyu muririmbyi yakoreye muri uyu mujyi ataratabaruka.
Umwuzukuru wa Bob Marley, Skip Marley araza kuririmba muri kino gitaramo kiza kuba gihagarariwe n’uwari umugore we Rita, akaba yaranafashaga kuririmba uyu wahoze ari umunyamuziki w’ikirangirire, hamwe n’umukobwa wiwe Cedella.
Iki gitaramo kiraza kuba kigizwe n’indirimbo za Bob Marley zisubirwamo n’itsinda ry’abaririmbyi Chineke, Orchestra baza kuba bari kumwe na Skip n’abandi.
Iki gitaramo kiri mu bikorwa byateguwe na BBC byo kwizihiza imyaka 60 igihugu cya Jamaica ari nacyo gihugu cya Bob Marley yavukiyemo kimaze kigenga, hamwe kandi no mu birori byo gutangiza imikino ya Commonwealth 2022 itegekanijwe kubera i Birmingham.
Skip Marley yagize ati: “Nditeguye kuririmbana na Chineke mu kugarura cyangwa kwibutsa abantu umuziki wa Sogokuru. Kuririmba mu gitaramo cyo mu Bwongereza aho umuziki wa sokuru usanzwe ukundwa cyane rwose biraza kuba ari ibintu bidasanzwe”.
Skip Marley ni umunyamuziki w’imyaka 26 yavukiye muri Jamaica, nyina ni Cedella Marley umuhanzikazi ukomeye kandi wahawe ibihembo 3 bya Grammys awards akaba ari umukobwa wa Bob Marley.
Hashize imyaka 41 Bob Marley ahitanwe na kanseri i Miami muri Leta Zunze Ubumwe za Amerika, ku myaka 36.
