MUTUNGIREHE SAMUEL
Mu gihe ikibazo cy’abana bahisemo kwibera mu mihanda b’inzererezi gisa n’icyaburiwe umuti ngo basubire mu miryango nk’uko biri mu itegeko nshinga, kuri uyu wa kane tariki ya 29 Ukwakira 2020, abafatanyabikorwa b’imiryango itari iya Leta bakorera mu karere ka Nyarugenge basinyiye gusubiza bene abo bana mu miryango, ibibazo byabo bigakurikiranirwayo bakava burundu mu muhanda abashoboye bagasubira mu ishuri.
Imwe mu miryango itari iya leta ikorera muri aka karere ka Nyarugenge, nk’akarere kagaragaramo abana benshi bari mu mihanda, yemeye gusinyana amasezerano n’ubuyobozi bw’akarere, buri umwe mu miryango igera kuri 20 wiyemeza gusubiza mu ngo abana bo mu murenge watoranyije, ukazaba ari naho ubahera ubufasha butandukanye bari mu miryango yiyemeje kubakira.
Mu muhango wo gushyira umukono ku masezerano, Umuyobozi Nshingwabikorwa w’akarere ka Nyarugenge, Ngabonziza Emmy yashimiye iyo miryango yagize icyo gitekerezo, yibutsa ko umwana ukiri mu muhanda nawe ari uw’agaciro nk’abandi.
Yakomeje agira ati “Nk’uko akarere ka Nyarugenge mukazi ni akarere kagendwa n’abantu benshi ndetse kanakunze kugaragaramo abana benshi bari mu mihanda bakunze kwita inzererezi, ariko nanone ntabwo abana barimo bakomoka muri aka karere gusa, haba hari abaturuka mu turere dutandukanye no hanze ya Kigali ndetse n’utwo mu mujyi wa Kigali.”
Yakomeje avuga ko hari byinshi bikorwa ngo umwana wese arererwe mumuryango birimo n’uko imiryango ibigiramo uruhare, ababyeyi bakumva inshingano zabo ku bana babo byananirana hakaba na gahunda yo kubakura mu mihanda bagasubira iwabo cyane ko hafi ya bose baba bafite iwabo baturutse.
Ati “Ariko tukanagenzura n’impamvu zituma bajya mu muhanda; izo ni zo uyu munsi byatumye duhura n’abafatanyabikorwa bacu batandukanye barimo imiryango itegamiye kuri leta yaba mpuzamahanga n’iyo mu Rwanda kugira ngo twungurane ibitekerezo ku cyakorwa banarebe uruhare rwabo.
Bagiye gukurikirana aba bana bari mu miryango bitandukanye cyane na politiki yahozeho mbere, yo gukura abana mu mihanda babajyana mu bigo ngororamuco.”
Ngabonziza yibukije ko hari ibigo ngororamuco kimwe cyangwa bibiri bishobora kuba byagumaho bitewe nuko hari abana bashobora kuba barakoresheje ibiyobyabwenge bikaba byasaba ko babanza gusubizwa mu buzima busanzwe no kuvurwa ingaruka zabyo.
Imwe mu miryango yiyemeje gukurikirana abana bari mu mihanda bo mu karere ka Nyarugenge, yagaragaje ko ihangayikishijwe n’ubuzima bw’abo bana bari mu mihanda kuko nta mwana ukwiye kurererwa hanze y’iwabo, bityo bazita cyane ku kibatera guta iwabo.
Muri iyo miryango harimo Indaro, uyoborwa na Cybahiro Erci nawe wigeze kuba umwana wo mu muhanda akitabwaho ubu akaba yiyemeje no kwita ku gukura abana mu mihanda yo mu murenge wa Kigali.
Urimubenshi Marc nawe yiyemeje gukura abana bose mu mihanda yo mu murenge wa Gitega.
Akarere ka Nyarugenge gatangaza ko kafashe amezi atanum kuva muri Gicurasi 2020 bakuye abana 408 mu mihanda bajyanwa mu ngo iwabo ariko muri rusange bamaze gukura mu mihanda abana barenga 1000 barimo n’abakomoka mu tundi turere.
Gusa nubwo bimeze gutyo, muri abo bana 408 harimo abagera ku 118 bagiye bagaruka mu mihanda bakingera bagasubizwayo, gutyo gutyo.
