Yashyizweho na: Imfurayabo Pierre Romeo
Umugabo witwa Damascene w’imyaka 25 wo mu mudugudu wa Ruyenzi, Akagari ka Nzove, Umurenge wa Kanyinya muri Nyarugenge arashakishwa na Polisi akurikiranyweho gutwika umugore we n’icyuma gishyushye ahantu hatandukanye harimo no ku myanya y’ibanga.
Umugore we witwa Clarisse afite imyaka 19 y’amavuko ubu akaba yajyanjywe ku kigo nderabuzima cya Kanyinya.
Amakuru avuga ko Damascene yatwitse umugore we henshi ku mubiri we harimo no ku kibuno
Nyuma ngo yamufungiranye mu nzu, ariko abashinzwe umutekano baraza baruca bamukuramo bamujyana kwa muganga.
Umunyamabanga nshingwabikorwa w’Umurenge wa Kanyinya Jean Claude Niyibizi yabwiye Umuseke ko biriya byaraye bibaye ahagana sa moya z’ijoro.
Ati: “ Byabaye Damascene yakoreye umugore we iyicarubozo. Twamubuze ariko hari amakuru dufite y’uko yaba yagiye za Kamonyi tuzamufata.”
Avuga ko babanaga mu buryo butemewe n’amategeko kuko umugore yari afite imyaka 19 y’amavuko kandi ngo amategeko ntiyemerera umuntu ufite iriya myaka gushaka.
Asaba abaturage kujya baha amakuru abayobozi igihe cyose bumvise ko hari urugo rurimo amakimbirane, hakaba hakumirwa ko yavamo ubwicanyi cyangwa ikindi cyabangamira uburenganzira bwa muntu.
Inkuru dukesha Umuseke
