Yanditswe na Mutungirehe Samuel
Minisiteri y’Ubuzima yatangaje ko igiye gutangira gukingira COVID-19 ikiciro cy’abana, bafite imyaka kuva kuri 11 kumanuka kugera kuri 5 y’amavuko.
Byatangajwe n’Umunyamabanga wa Leta ushinzwe ubuvuzi Rusange muri MINISANTE, Dr. Mpunga Tharcisse, asobanurira abanyarwanda impamvu bageze kuri iki cyiciro.
Yabwiye Radio Rwanda ko "Gukingira abana ni ingirakamaro, kuko ukingira kugira ngo ugire ubudahangarwa ku ndwara."
Dr. Mpunga yasobanuye ko inkingo zizakoreshwa ni inkingo zihariye, zigenewe abana, ’si kuri buri wese’, bitandukanye n’izindi zari zisanzwe zikoreshwa ku bindi byiciro.
Abana bazakingirwa ni ukuva ku myaka 5 kugeza ku myaka 11 kuko abafite imyaka 12 bahawe inkingo zisanzwe.
Ishami rigenga ibyo kurya n’itangwa ry’imiti muri U.S ry’ikigo gishinzwe gukumira no kurwanya ibyorezo (CDC) rihetse kwemeza inkingo ebyiri za COVID -19 ku bana.
Urukingo Pfizer BioNTech COVID-19 ruhabwa abana kuva ku mezi atandatu kugeza ku myaka 5, kandi tugatangwa mu byiciro bitatu. Urukingo rwa Moderna narwo ruhabwa abana kuva ku mezi atandatu kugeza ku bafite imyaka itarenga itandatu kandi tugatangwa mu byiciro bibiri.
Abashakashatsi baracyagenzura ngo barebe niba abana bazakenera urukingo rwo gushimangira.
N’iyo umwana yaba yarigeze kurwara COVID-19 aba agomba kuzuza inkingo za COVID-19 kugira abe arinzwe icyo cyorezo.
Kugeza ubu mu Rwanda abari hejuru y’imyaka 12 bafashe inkingo ebyiri za COVID19 ni 99%, abarengeje imyaka 18 bafashe urukingo rwo gushimangira bari hejuru ya 70%, mugihe abafashe urukingo rwa kabiri rwo gushimangira bageze kuri 30%.
